Khutbah Jumat Bahasa Minang; Manyiapkan Diri Sabalun Mati

Kematian pasti menemui setiap insan. Tidak ada satupun manusia yang mampu lari darinya. Kematian adalah akhir dari perjalan kita di dunia dan menjadi awal dari kehidupan yang sebenarnya, yaitu kehidupan akhirat. Semua amal perbuatan kita di permukaan bumi selama ini akan dipertanggungjawabkan di hadapan pengadilan Allah .Selayaknya setiap manusia menyiapkan bekal yang terbaik untuk menjalani hidup setelah kematian.

 

Teks khutbah Jumat berikut ini mengajak kepada para jamaah untuk mempersiapkan diri menjelang kematian datang menjemput. Adapun  tema khutbah adalah “Khutbah Jumat Bahasa Minang; Manyiapkan Diri Sabalun Mati”. Untuk mencetak naskah khutbah Jumat ini, silakan klik ikon print berwarna merah di atas atau bawah artikel ini (pada tampilan desktop). Semoga bermanfaat.

 

 Khutbah I

 

  اَلْحَمْدُ لِلَّهِ الَّذِيْ خَلَقَ ٱلْمَوْتَ وَٱلْحَيَوٰةَ لِيَبْلُوَكُمْ أَيُّكُمْ أَحْسَنُ عَمَلًا ۚ وَهُوَ ٱلْعَزِيزُ ٱلْغَفُورُ. أَشْهَدُ أَن لاَّ إِلَهَ إِلاَّ الله وَحْدَهُ لَا شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ. اللّٰهُمَّ صَلِّ وَسَلِّمْ عَلَى سَيِّدِنَا مُحَمَّدٍ، وَعَلَى أٰلِهِ وَصَحْبِهِ وَمَنْ وَالاَهُ أَمَّا بَعْدُ؛
 

فَيَآ أَيُّهَا النَّاسُ، اتَّقُوا اللهَ حَقَّ تَقْوَاهُ كَمَا قَالَ تَعَالَى: يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ
 

قَالَ اللهُ تَعَالَى فِي كِتَابِهِ الْكَرِيْمِ، أَعُوْذُ بِاللهِ مِنَ الشَّيْطَانِ الرَّجِيْمِ، بِسْمِ اللهِ الرَّحْمَنِ الرَّحِيْمِ، اِنَّمَا الْمُؤْمِنُوْنَ اِخْوَةٌ فَاَصْلِحُوْا بَيْنَ اَخَوَيْكُمْ وَاتَّقُوا اللّٰهَ لَعَلَّكُمْ تُرْحَمُوْنَ. صَدَقَ اللهُ الْعَظِيْمِ

 

Kaum muslimin wal muslimat sidang jamaah Jumaik nan dimuliakan dek Allah

Awal kalam bamulo kato, tiado kato nan patuik taucap di lisan kito, tiado syair nan labiah indah untuak kito dendangkan, malainkan mamuji dan mamuja Allah SWT. Kareno barakaik rahmat jo karunia Baliau, kito bisa malakukan aktivitas sahari-sahari. Ado nan ka parak, ado nan manggaleh dan ado pulo nan karajo di kantua. 

 

Namun Allah agiah nikmaik lain kapado kito basamo, yaitu nikmaik kaimanan, sahinggo tagarak hati kito untuak mamanuahi panggilan Alllah untuak manunaikan ibadah Jumaik sacaro bajamaah. Tantangan  pado itu kaum muslimin, marilah kito basamo-samo basyukur mangucapkan alhamdulillahirabbil’alamiin, sagalo puji hanyo untuak Allah swt.

 

Kamudian dari pado itu kaum muslimin, shalawaik barangkaikan salam, marilah sanantiaso kito basalawaik kapado junjungan alam, yaitu Nabi Muhammad saw. Allaahumma shalli ‘alaa sayyidina Muhammad wa ‘ala aali sayyidinaa Muhammad. Kito samo-samo baharap dangan salawaik nan salalu mambasahi lidah jo bibia kito, mudah-mudahan kito dinobaikkan sabagai umaik nan barhak mandapek syafaat baliau di yaumil qiyamah nanti.

 

Kaum muslimin, khatib indak akan bosan-bosan mangajak kaum muslimin dan kaum muslimat, tarutamo kapado diri khatib pribadi, untuak sanantiaso maningkekkan katakwaan kito kapado Allah. Yaitu dengan caro mangarajokan sagalo parintah dari Allah swt dan maninggalkan sagalo bantuak larangan baliau. 

 

Kaum muslimin wal muslimat sidang jamaah Jumaik nan dimuliakan dek Allah

Alhamdulillah, pado kasempatan nan babahagia ko, kito masih dibarikan dek Allah swt kesempatan untuak manjalani kahidupan dan baibadah kapado-Nyo. Pakaro iko sangaik paralu kito inuak manuangi kaum muslimin. Sabab, kalau kito mancaliak ka suok jo kida, mako akan kito dapati babarapo dunsanak kito nan dulu basamo-samo jo kito pai ka musajik pai sumbayang, namun kini indak lai basamo kito. Karno Allah swt alah mamanggia mereka ka pangkuan Baliau.

 

Dengan mainuak manuangi pakaro ko, saindaknyo itu dapek manyadarkan badan diri kito nan mungkin sajo lengah kalau kasado alah kito ko pasti akan manamui kamatian. Hal iko alah dijanjikan dek Allah swt dalam kitab suci baliau:

 

كُلُّ نَفْسٍ ذَاۤىِٕقَةُ الْمَوْتِۗ ثُمَّ اِلَيْنَا تُرْجَعُوْنَ
 

Artinya: Tiok-tiok nan banyao pasti akan marasokan mati. Kamudian hanyolah kapado Kami kalian dipulangkan. (QS. Al Ankabut: 57).

 

Dalam ayaik iko kaum muslimin, Allah swt manggunokan lafaz “kullu”. Di dalam kajian ilimu mantiak, dijalehkan bahwasonyo susunan kalimaik nan tadiri dari “kullu” dan diiriangi dek lafaz nan umum pulo, yaitu kato “nafsi”, iko mamiliki makna kulliyah, nan bararti bamakna kasado alahnyo tanpa pengecualian. Sahinggo badasarkan kaji ilmu mantiak ko, indak ado satupun nan banyao di ateh di dunia ko akan abadi tanpa marasokan kamatian. Pamahaman iko sajalan jo firman Allah swt di ayaik nan lain nan babunyi:

 

كُلُّ مَنْ عَلَيْهَا فَانٍۖ وَّيَبْقٰى وَجْهُ رَبِّكَ ذُو الْجَلٰلِ وَالْاِكْرَامِۚ
 

Artinyo: “Kasadoalah nan ado di atehnyo (bumi) itu akan binaso. (Akan tatapi,) wajah (zat) Tuhanmu nan mamiliki kebesaran dan kamuliaan tatap kekal.”

 

Syekh Ibnu ‘Asyur di dalam tafsirnyo At-Tahrir wat Tanwir manjalehkan bahwasonyo kato “man ‘alaihaa” di dalam ayaik iko mukasuiknyo adalah seluruh manusia nan ado dibumi. Samantaro ayaik iko manarangkan tantang bahwa sado alah nan ado di ateh permukaan bumi iko akan manjadi fana atau binaso. Artinyo ayaik iko maingekkan kapado kito basamo parihal kamatian dan balasan nan ka disiapkan kapado kito sasudah mangalami kamatian.

 

Kaum muslimin sidang jamaah Jumaik nan dimuliakan dek Allah

Sasudah manyadari akan adonyo kamatian, hal nan lain nan paralu kito ingek-ingek katiko manjalani iduik di ateh dunia ko adalah bahwa kamatian bisa mandatangi kito bilo sajo Allah swt kahandaki. Sahinggo katiko Allah swt alah bakahandak untuak mamatikan manusia, mako kito indak akan bisa maundur agak sadatiak pun. Hal iko sabagaimano nan alah dijalehkan dek Allah SWT di dalam kitab suci Baliau Surek  Al-A’raf ayaik 34 nan babunyi:

 

وَلِكُلِّ أُمَّةٍ أَجَلٌ ۖ فَإِذَا جَاءَ أَجَلُهُمْ لَا يَسْتَأْخِرُونَ سَاعَةً ۖ وَلَا يَسْتَقْدِمُونَ
 

Artinyo: “Tiok-tiok umaik mampunyoi bateh wukatu, mako apobilo alah tibo wukatunyo, mako mereka indak akan bisa mangudurkannyo agak subanta dan indak pulo bisa mampacapeknyo.” (QS. Al-Araf : 34).

 

Dalam ayaik lain Allah bapasan kapado kito bahwasonyo kito indak akan bisa lari dari nan namonyo kamatian. Allah swt bafirman:

 

قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ مُلَاقِيكُمْ ۖ ثُمَّ تُرَدُّونَ إِلَىٰ عَالِمِ الْغَيْبِ وَالشَّهَادَةِ فَيُنَبِّئُكُمْ بِمَا كُنْتُمْ تَعْمَلُونَ

 

Artinyo: “Katokanlah: ‘Sasungguahnyo kamatian nan kalian daripado nyo, mako sasungguhnyo kamatian itu akan manamui kalian, kamudian kalian akan dipulangkan kapado Allah SWT, zat nan mangatahui nan ghaib dan nan nyato, lalu Allah baritakan kapado kalian apo nan kalian pabuek Artinyo: “salamo ko. " (QS. Al-Jumu’ah ayaik 8).

 

Kaum muslimin sidang jamaah Jumaik nan dimuliakan dek Allah

Oleh karno itu kaum muslimin, maingek-ingek datangnyo kamatian iko adolah pakaro nan sangaik paralu kito pabuek. Jan sampai kito takicuah dan tapadayo jo kamegahan iduik di ateh di dunia ko. Sabab dunia hanyo samantaro, hanyo manjadi tapek singgah. Kahidupun nan sabananyo adolah kahidupan kito di akhiraik kelak. 

 

Urang nan lai ingek akan kamatian, tantu akan marasokan kasadihan katiko dirinyo bagalimang jo doso. Saharusnyo kito sabagai umaik manusia marasokan kasadihan katiko dicaritokan pakaro mati dihadapan kito. Sabab, kamatian akan manjadi awal dari maso diadili nyo karajo kito salamo iduik di ateh dunia dek Allah. Dek karno itu kaum muslimin, mari kito sisiahkan wukatu kito untuak maingek nan namonyo kamatian. Sabab para ulama kito dari dahulu adolah urang nan madawamkan maingek kamatian, sahinggo iko dapek maningkekkan raso batuhan ka Allah. 

 

Di dalam Ihya’ ulumiddin, Imam Al-Ghazali mancaritokan bahwasonyo khalifah Umar bin Abdul Aziz mampunyoi kabiasaan nan sangaik baiak parihal kamatian. 

 

“Adolah Khalifah Umar bin Abdul Aziz mangumpuakan para ahli fikih di satiok malam. Lalu mereka basamo-samo maingek-ingek nan namonyo kamatian, hari kiamaik sarato akhiraik. Kamudian kasado alah mereka manangih basamo-samo, saakan-akan di hadapan mereka itu ado jenazah.”

 

Dari kisah ko, dapek kito dapek kito ambiak sabuah palajaran bahwasonyo sabagitu pantiang nyo maingek kamatian iko bagi kito manusia. Bahkan Umar bin Abdul Aziz nan salevel khalifah, pamimpin umaik sanantiaso maingek mati satiok malam hari. Iko manandokan pakaro mati bukanlah pakaro main-main. Malainkan pakaro nan sangaik pantiang bagi kito umaik manusia. 

 

Kaum muslimin sidang jamaah jumaik nan dimuliakan dek Allah swt

Maingek kamatian sangaik lah pantiang. Karno dengan maingek iko, kito bisa manyiapkan bekal iduik kito untuak kahidupan di akhiraik nanti. Maingek kamatian dapek mambangkikkan sumangaik kito untuak mampabanyak amal ibadah dan maningkekkan katakwaan kito kapado Allah swy. Kareno ndak ado bekal atau persiapan nan paliang rancak untuak mahadapi hiduk di akhiraik malainkan bekal ketakwaan. Allah bafirman:

 

وَتَزَوَّدُوا۟ فَإِنَّ خَيْرَ ٱلزَّادِ ٱلتَّقْوَىٰ

 

Artinyo: “Berbekallah, dan sasungguahnyo sabaiak-baiak bekal adolah takwa.” (QS: al-Baqarah ayaik 197)

 

Dalam ayaik iko Allah  sacaro jaleh manarangkan kapado kito basamo bahwa ketakwaan adolah nan paliang gadang untuk manjalani iduik di akhiraik nanti. Kareno takwa adolah 

 

ssabuah parilaku nan manunjuakkan penghambaan kito kapado Allah swr. Sahinggo urang-urang nan batakwa akan sanantiaso manjalani sagalo nan disuruah dek Allah. 
 

dan manjauahi sagalo nan dilarang dek Allah . Dengan adonyo wujuik ketakwaan dalam badan diri kito, itu akan bisa mambukak pintu rahmat dari Allah swt untuak maridhoi kito dan masuak ka sarugo Baliau nan dipanuahi jo kabahagiaan.

 

Kaum muslimin sidang jamaah Jumaik nan dirahmati Allah 

Kamatian akan mamutuih jalan kito untuak malakukan amal shaleh. Urang nan alah maningga dunia indak akan bisa babuek amal sabagaimano katiko mereka iduik di ateh dunia. Namun, Rasulullah  alah manjalehkan kapado kito malalui hadisnyo akan adonyo babarapo amalan nan pahalonyo akan sanantiaso mangalir kapado kito walaupun kito alah mati takubua di dalam tanah. Rasulullah saw basabda di dalam hadisnyo:

 

إِذَا مَاتَ الإنْسَانُ انْقَطَعَ عنْه عَمَلُهُ إِلَّا مِن ثَلَاثَةٍ: إِلَّا مِن صَدَقَةٍ جَارِيَةٍ، أَوْ عِلْمٍ يُنْتَفَعُ بِهِ، أَوْ وَلَدٍ صَالِحٍ يَدْعُو له.
 

Artinyo: “Apobilo mati manusia, mako taputuih darinyo amalnyo kecuali dari tigo pakaro; shadaqah jariyah, ilmu nan bamanpaaik, atau anak nan shaleh nan sanantiaso mandoakannyo.” (HR. Muslim)

 

Dalam hadis ko kaum muslimin, Rasulullah SAW maingekkan kito tantang babarapo amal nan bisa mangalir pahalonyo kapado kito walaupun kito alah maninggakan kahidupan dunia ko. Yaitu:

 

1. Shadaqah jariyah

Shadaqah jariyah adolah pambarian kito kapado urang lain ataupun yayasan sosial nan baguno untuak kamakmuran basamo. Shadaqah jariyah iko biasonyo barupo bantuak wakaf dan sumbangan. Jadi jikok ado diantaro kito nan mawakafkan tanah misalnyo untuak pambangunan masajik atau pesantren, mako pahalo dari wakaf itu akan sanantiaso mangalir kapado kito walaupun kito alah maningga dunia.

 

Untuak itu kaum muslimin, marilah kito pagunokan kalabiahan nikmaik nan diagiah dek Allah swt ko untuak tabungan kito nanti di akhiraik. Karno apo nan lah kito wakafkan di dunia ko akan sanantiaso mangalir sampai nanti

 

2. Ilmu nan bamanpaaik

Ilmu nan bamanpaaik yaitu ilimu nan kito tuntuik dan kito ajarkan kapado urang lain. Sahinggo ilimu nan kito bagi ka urang lain itu manjadi mampaaik untuak kahidupan urang lain. Hal iko bisa manjadi pahalo nan sanantiaso mangalir kapado kito walaupun kito lah tatimbun dalam tanah. 

 

Contohnyo kaum muslimin, ado diantaro kito nan memang lah bakarajo sabagai guru. Mako mari kito niatkan mangajar di sakolah-sakolah itu sabagai amal nan ikhlas karno Allah SWT. Mako apo nan kito ajarkan kapado anak murik kito itu akan manjadi panolong bagi kito nanti di akhiraik. 

 

Bagi kaum muslimin nan indak baprofesi manjadi guru, indak paralu sadiah. Sabab ilmu dalam hadis ko indak hanyo bamakna ilimu nan diajarkan di sakolah-sakolah. Tapi mancakup ilimu nan lain nan mambari dampak baiak untuak kahidupan basamo. Misalnyo ado diantaro kito nan pandai batukang mambangun rumah. Mako ilimu tukang ko katiko kito ajarkan ka urang lain, mako iko akan manjadi barakaik untuak kito nanti. 

 

3. Doa anak nan siak

Anak nan siak, nan rajin ka surau akan mambantu kito nanti katiko alah barado di dalam kubua. Mako oleh karno itu kaum muslimin mari kito pasiapkan generasi kito ko dengan bekal ilimu agamo nan cukuik. Minimal anak-anak nan tau jo kawajiban nyo sabagai muslim, mode sumbayang, puasa, mangaji al-Quran dan lain sabagainyo. Sabab kaum muslimin, kito indak akan bisa maharokkan doa urang lain sacaro taruih manaruih malainkan doa dari anak kito. 

 

Disampiang itu kito sabagai anak, sapatuiknyo lah kito basamo-samo mandoakan urang tuo kito baiak nan masih iduik maupun nan alah maningga. Mari kito sanantiaso mangirimkan pahalo bacaan surek yasin kito untuak mereka nan alah maningga, atau juo bisa kito bawakaf ka masajik atau pesantren, dan kito niatkan pahalonyo untuak baliau nan alah mangahului kito. Hal iko pernah dicontohkan dek salah seorang sahabat dulu di zaman Nabi saw. dalam sabuah riwayaik dijalehkan:

 

عَنْ ابْنِ عَبَّاسٍ أَنَّ رَجُلًا قَالَ يَا رَسُولَ اللَّهِ إِنَّ أُمِّي تُوُفِّيَتْ أَفَيَنْفَعُهَا إِنْ تَصَدَّقْتُ عَنْهَا قَالَ نَعَمْ 
 

Artinya: “Riwayaik iko ditarimo dari Ibnu Abbas radhiyallahu ‘anhuma, bahwa ado saurang laki-laki nan pernah batanyo ka Rasulullah saw, 

“wahai Rasulullah, sasungguahnyo ibu ambo alah maningga, apokah ado manpaaik untuak baliau jikok ambo basadaqah untuknyo.” Rasulullah SAW menjawab; “tentu.” (HR. Tirmidzi)

 

Kaum muslimin, hadis ko manjalehkan kapado kito basamo bahwasonyo caro babakti kapado urang tua nan alah maningga disampiang mandoakan baliau adolah dengan caro basadaqah nan pahalonyo kito niaikkan untuak baliau.

 

Kaum muslimin sidang jamaah Jumaik nan dimuliakan dek Allah

Kesimpulan 

 

Marilah kito basamo-samo mampasiapkan diri untuak manyambuik kamatian. Karno mati adolah sasuatu nan pasti datang manjapuik kito. Dan kito indak ado nan tau kapan kito akan dipanggia dek Allah. Sahinggo manyiapkan bekal ataupun modal untuak mati manjadi pakaro nan sangaik pantiang untuk kito siapkan mulai dari kini.

 

Diantaro bekal nan bisa kito siapkan adolah dengan sanantiaso maningkekkan kualitas ketakwaan kito kapado Allah swt. Disampiang itu mari kito pabanyak basaqah atau bawakaf, mangajarkan ilimu nan bamampaaik untuak banyak urang sarato mambekali anak-anak kito dengan ilimu agamo, sahinggo nanti katiko kito alah maningga mereka sanantiaso mandoakan kito.

 

Damikianlah khutbah kito pado saat kini, mudah-mudahan iko bisa manjadi bahan ranuangan dek kito basamo. 
 

Mudah-mudahan kito bisa maningkekkan amal ibadah dan ketakwaan kito di siso-siso umua kito nan tingga. Aamiin Yaa Rabbal ‘aalamiin.

 

بَارَكَ اللهُ لِي وَلَكُمْ فِي الْقُرْآنِ الْعَظِيْمِ وَنَفَعَنِي وَاِيِّاكُمْ بما فيه مِنَ الآيَاتِ وَالذِّكْرِ الْحَكِيْمِ. وَتَقَبَّلْ مِنِّيْ وَمِنْكُمْ تِلاوَتَهُ اِنّهُ هُوَ السَّمِيْعُ اْلعَلِيْمُ.. فَاسْتَغْفِرُوْا اِنَّهُ هُوَ اْلغَفُوْرُ الرَّحِيْمُ

 

Khutbah 2010

 

اَلْحَمْدُ للهِ عَلىَ إِحْسَانِهِ وَالشُّكْرُ لَهُ عَلىَ تَوْفِيْقِهِ وَاِمْتِنَانِهِ. وَأَشْهَدُ أَنْ لاَ اِلَهَ إِلاَّ اللهُ وَاللهُ وَحْدَهُ لاَ شَرِيْكَ لَهُ وَأَشْهَدُ أنَّ سَيِّدَنَا مُحَمَّدًا عَبْدُهُ وَرَسُوْلُهُ الدَّاعِى إلىَ رِضْوَانِهِ. اللهُمَّ صَلِّ عَلَى سَيِّدِنَا مُحَمَّدٍ وِعَلَى اَلِهِ وَأَصْحَابِهِ وَسَلِّمْ تَسْلِيْمًا كِثيْرًا أَمَّا بَعْدُ. فَياَ اَيُّهَا النَّاسُ اِتَّقُوااللهَ فِيْمَا أَمَرَ وَانْتَهُوْا عَمَّا نَهَى وَاعْلَمُوْا أَنَّ اللهَ أَمَرَكُمْ بِأَمْرٍ بَدَأَ فِيْهِ بِنَفْسِهِ وَثَـنَى بِمَلآ ئِكَتِهِ بِقُدْسِهِ وَقَالَ تَعاَلَى إِنَّ اللهَ وَمَلآئِكَتَهُ يُصَلُّوْنَ عَلىَ النَّبِى يآ اَيُّهَا الَّذِيْنَ آمَنُوْا صَلُّوْا عَلَيْهِ وَسَلِّمُوْا تَسْلِيْمًا
 

 اللهُمَّ صَلِّ عَلَى سَيِّدِنَا مُحَمَّدٍ صَلَّى اللهُ عَلَيْهِ وَسَلِّمْ وَعَلَى آلِ سَيِّدِناَ مُحَمَّدٍ وَعَلَى اَنْبِيآئِكَ وَرُسُلِكَ وَمَلآئِكَةِ اْلمُقَرَّبِيْنَ وَارْضَ اللّهُمَّ عَنِ اْلخُلَفَاءِ الرَّاشِدِيْنَ أَبِى بَكْرٍ وَعُمَر وَعُثْمَان وَعَلِى وَعَنْ بَقِيَّةِ الصَّحَابَةِ وَالتَّابِعِيْنَ وَتَابِعِي التَّابِعِيْنَ لَهُمْ بِاِحْسَانٍ اِلَى يَوْمِ الدِّيْنِ وَارْضَ عَنَّا مَعَهُمْ بِرَحْمَتِكَ يَا أَرْحَمَ الرَّاحِمِيْنَ

 اَللهُمَّ اغْفِرْ لِلْمُؤْمِنِيْنَ وَاْلمُؤْمِنَاتِ وَاْلمُسْلِمِيْنَ وَاْلمُسْلِمَاتِ اَلاَحْيآءِ مِنْهُمْ وَاْلاَمْوَاتِ اللهُمَّ أَعِزَّ اْلإِسْلاَمَ وَاْلمُسْلِمِيْنَ وَأَذِلَّ الشِّرْكَ وَاْلمُشْرِكِيْنَ وَانْصُرْ عِبَادَكَ اْلمُوَحِّدِيّن وَانْصُرْ مَنْ نَصَرَ الدِّيْنَ وَاخْذُلْ مَنْ خَذَلَ اْلمُسْلِمِيْنَ وَ دَمِّرْ أَعْدَاءَ الدِّيْنِ وَأَعْلِ كَلِمَاتِكَ إِلَى يَوْمَ الدِّيْنِ. اللهُمَّ ادْفَعْ عَنَّا اْلبَلاَءَ وَاْلوَبَاءَ وَالزَّلاَزِلَ وَاْلمِحَنَ وَسُوْءَ اْلفِتَن وَاْلمِحَنَ مَا ظَهَرَ مِنْهَا وَمَا بَطَنَ عَنْ بَلَدِنَا اِنْدُونِيْسِيَّا خآصَّةً وَسَائِرِ اْلبُلْدَانِ اْلمُسْلِمِيْنَ عآمَّةً يَا رَبَّ اْلعَالَمِيْنَ

 رَبَّنَا آتِناَ فِى الدُّنْيَا حَسَنَةً وَفِى اْلآخِرَةِ حَسَنَةً وَقِنَا عَذَابَ النَّارِ. رَبَّنَا ظَلَمْنَا اَنْفُسَنَا وَإنْ لَمْ تَغْفِرْ لَنَا وَتَرْحَمْنَا لَنَكُوْنَنَّ مِنَ اْلخَاسِرِيْنَ
 

 عِبَادَاللهِ ! إِنَّ اللهَ يَأْمُرُ بِاْلعَدْلِ وَاْلإِحْسَانِ وَإِيْتآءِ ذِي اْلقُرْبىَ وَيَنْهَى عَنِ اْلفَحْشآءِ وَاْلمُنْكَرِ وَاْلبَغْي يَعِظُكُمْ لَعَلَّكُمْ تَذَكَّرُوْنَ وَاذْكُرُوا اللهَ اْلعَظِيْمَ يَذْكُرْكُمْ وَاشْكُرُوْهُ عَلىَ نِعَمِهِ يَزِدْكُمْ وَلَذِكْرُ اللهِ أَكْبَرْ