Khutbah Jumat Sunda: Caket ka Alloh di Dunya Konci Kabagjaan di Akherat 

Sebagai makhluk sempurna dan diberi anugerah akal, manusia mestinya tidak hanya mengejar kebahagiaan dunia semata. Lebih dari itu, mereka harus berusaha meraih kebahagiaan hakiki dan abadi di akhirat kelak, yaitu kedekatan bersama Sang Pencipta, yaitu Allah Swt. 

 

Maka khutbah Jumat bahasa Sunda ini berjudul, “Khutbah Jumat Sunda: Caket ka Alloh di Dunya Konci  Kabagjaan di Akherat”. Untuk mencetak khutbah ini, silakan klik fitur download berwarna merah di atas atau bawah artikel ini (pada tampilan desktop). Semoga bermanfaat!

 

Khutbah I

 

اَلْحَمْدُ لِلّٰهِ الَّذِيْ تَفَرَّدَ بِجَلَالِ مَلَكُوْتِهِ، أَشْهَدُ أَنْ لَا إِلَهَ إِلَّا اللهُ وَحْدَهُ لَا شَرِيْكَ لَهُ، شَهَادَةَ مُوْقِنٍ بِتَوْحِيْدِهِ، وَأَشْهَدُ أَنَّ سَيِّدَنَا مُحَمَّداً عَبْدُهُ الْمُصْطَفَى، وَأَمِيْنُهُ الْمُجْتَبَي وَرَسُوْلُهُ الْمَبْعُوْثُ إِلَى كَافَةِ الْوَرَى، اَللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِهِ مَصَابِيْحِ الدُّجَى، وَعَلَى أَصْحَابِهِ مَفَاتِيْحِ الْهُدَى، وَسَلِّمْ تَسْلِيْمًا كَثِيْراً

 

أَمَّا بَعْدُ: أَيُّهَا النَّاسُ، اِتَّقُوا اللهَ وَاعْبُدُوْهُ، فَإِنَّ اللهَ خَلَقَكُمْ، لِذَلِكَ قَالَ تَعَالَى: ﴿ سَنُرِيهِمۡ ءَايَٰتِنَا فِي ٱلۡأٓفَاقِ وَفِيٓ أَنفُسِهِمۡ حَتَّىٰ يَتَبَيَّنَ لَهُمۡ أَنَّهُ ٱلۡحَقُّۗ أَوَلَمۡ يَكۡفِ بِرَبِّكَ أَنَّهُۥ عَلَىٰ كُلِّ شَيۡءٍ شَهِيدٌ ﴾ صَدَقَ اللهُ الْعَظِيْمُ

 

Sidang Jumah anu dimulyakeun ku Alloh

Puji sareng syukur urang sami-sami panjatkeun ka Alloh Nu Maha Gofur. Dzat anu teu aya lirenna maparin ni’mat ka urang sadayana. Solawat miwah salam mugia dilimpahkeun ka Baginda Rosul, Nabi Muhammad Saw oge ka para sahabatna, para tabi’in sareng tabiatna, hingga urang sadayana anu miharep kakiatan kanggo tumut kana sunah sareng ajaranna.

 

Sidang Jumah anu dimulyakeun ku Alloh

Ayana urang di alam dunya teh kedah gaduh tujuan anu tangtu. Sabab, lamun teu gaduh tujuan, urang bakal gampang luak-leok ka mana wae, nu akhirna matak ka sasar lampah. Salajengna, tujuan oge kedah jelas sareng leres. Sabab, lamun henteu jelas mah, bisa wae urang ngahontal tujuan anu salah. Akhirna urang cilaka-cilaka keneh. 

 

Ku hal sakitu, tujuan hirup urang teh kedah leres oge tangtu. Kanggo nangtoskeunnana, urang tos dipandu ku Alloh Ta’ala dina Al-Quran, nyaeta dina do’a anu sok biasa diaos ku urang: 

 

رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ

 

Hartosna, “He Pangeran abdi sadaya, pasihan abdi kasaean di dunya sareng kasaean di akherat, sarta salametkan abdi tina siksa seueneu naraka,” (QS. Al-Baqarah: [2]: 201).

 

Janten numutkeun ieu ayat, tujuan anu kedah dihontal ku urang teh nyaeta kabagjaan di dunya, kabagjaan di akherat, sareng kasalametan tina seuneu naraka. 

 

Sidang Jumah anu dimulyakeun ku Alloh 

Nanging, dina prak-prakkannana, urang sok leuwih museur kana tujuan di dunya, sedengkeun tujuan di akherat oge kasalametan tina seuneu naraka mah sok katotolerkeun. Tah meungpeung urang masih dipaparin kasempetan kumelenang di alam dunya, hayu urang lereskeun tujuan urang.  

 

Salajengna, kumaha carana supaya urang tiasa ngahontal kabagjaan dunya akherat?  Carana, pilari Alloh di dunya, Insyaalloh urang tiasa milari Alloh di akherat. Pendakan Alloh di dunya, Insyaalloh, urang bakal pendak sareng Alloh di akherat. Sing ma’rifat urang ka Alloh, Insyaalloh urang bakal ma’rifat ka Alloh di akherat. 

 

Hal ieu sanes mung ukur kira-kira, nanging parantos dirumuskeun ku para ulama hakekat, di antawisna ku Syekh Ibnu ‘Athaillah dina kitab Al-Hikam:

 

مِنْ عَلَامَاتِ النَّجْحِ فِي النِّهَايَاتِ اَلرُّجُوْعُ إِلَى اللهِ فِي الْبِدَايَاتِ

 

Hartosna, “Di antara tanda kesuksesan di akhir (akhirat) nyaeta uih ka Alloh di awal (dunya).” 

 

Sidang Jumah anu dimulyakeun ku Alloh 

Numutkeun Syekh Ibnu ‘Atha’illah, supaya urang tiasa ngahontal kabagjaan jeung kasalametan di akherat teh nyaeta uih ka Alloh di dunya keneh. Dumasar hal ieu, janten atuh urang teh wajib uninga ka Alloh. Wajib ma’rifat ka Alloh. 

 

Saatos ma’rifat insya Alloh urang bakal tiasa nyambung, kumaula sareng eling ka Gusti Alloh. 
Dina leresan ieu, urang parantos dipaparin rambu-rambu supados tiasa ma’rifat ku Alloh. Nyaeta nitenan tanda-tanda kakawasaan Alloh nu aya dina diri sareng sakurilingeun urang. Kitu sakumaha dina Al-Quran: 

 

سَنُرِيْهِمْ اٰيٰتِنَا فِى الْاٰفَاقِ وَفِيْٓ اَنْفُسِهِمْ 

 

Hartosna, “Kaula bakal ningalikeun keur maranehna tanda-tanda (kakawasaan) Kaula di satiap penjuru bumi sareng dina diri maranehna sorangan,” (Q.S. Fushilat [41]: 53). 

 

Pantesan ku ulama disebatkeun, di antawisna dina kitab Hilyatul Auliya kagungan Abu Na’im, Jilid 10, kaca 108, nalika urang hoyong uninga ka Pangeran, maka sing uninga kana diri.

 

مَنْ عَرَفَ نَفْسَهُ فَقَدْ عَرَفَ رَبَّهُ 

 

Hartosna, “Sing saha-saha jalma anu tos uninga ka dirina, maka temen-temen bakal uninga ka Pangerannana.” 

 

Sidang Jumah anu dimulyakeun ku Alloh 

Hal ieu negeskeun keur urang, lamun hoyong ma’rifat ka Alloh, urang kedah leres-leres uninga kana tanda-tanda kakawasaan Alloh nu aya dina diri urang sareng sakuriling urang. 

 

Nanging, ma’rifat di dieu sanes ukur kana lahiriah atanapi fisikna hungkul, tapi kedah langkung ti kitu. Hartos urang kedah uninga kana jati diri sareng hakekat urang nu saenyana. Ti mana urang, tina naon urang. Ku saha urang diciptakeun, keur di mana urang, naon tugas jeung tujuan urang. Dibekelan naon urang. Oge bakal uih ka mana urang.  

 

Eta pertarosan anu mendasar anu kedah kawaler ku urang. Dugika urang uninga kana asal-muasal diri urang, uninga ka Pangeran anu nyiptakeun urang, naon tugas urang, oge uninga kana sifat, watak, jeung tabiat diri urang sorangan.  

 

Nyakitu keneh urang kedah uninga yen dina diri urang ngancik sifat-sifat kahewanan anu kedah dielehkeun ku sifat-sifat kasaean urang. Memang saleresna eta sifat pamekelan Pangeran, sakumaha anu tos diuningakeun: 

 

فَأَلْهَمَهَا ‌فُجُورَهَا وَتَقْوَاهَا

Hartosna, “Maka Alloh ngailhamkeun kana diri manusa kafasekan sareng katakwaanna,” (QS. As-Syams [91]:8).  

 

Nanging upami urang hoyong unggul ti makhluk lian, maka kedah bisa ngelehkeun sifat-sifat kahewanan tur sifat-sifat goreng sanesna. Dijelaskeun ku Imam al-Ghazali, nalika hiji jalma tos tiasa ngelehkeun sifat-sifat kahewanan, oge nyeueurkeun sifat-sifat kasaean, maka Insyaalloh bakal tiasa langkung caket ka Pangeran. Sabab, Pangeran janten sumber sagala rupi kasaean. 

 

Nalika tos mingkin caket ka Pangeran, maka urang bakal langkung ngawaro ka Pangeran, sakumaha tugas anu tos dipaparinkeun ku Mantenna. 

 

وَمَا ‌خَلَقْتُ الْجِنَّ وَالْإِنْسَ إِلَّا لِيَعْبُدُونِ   

 

Hartosna, “Teu pati-pati Kaula nyiptakeun jin sareng manusa, anging supaya aribadah ka Kaula,” (QS. Adz-Dzariyat [51]: 56). 

 

Sidang Jumah anu dimulyakeun ku Alloh 

Singketna, salaku manusia urang kedah uninga kana jati diri urang, kedah ma’rifat ka Pangeran, kedah uninga kana tujuan anu saenyana, kedah uninga kana cara ngahontalna. 

 

Sing emut, tujuan hirup urang teh ngahontal kabagjaan duna sareng akherat. Salah sawios carana nyaeta puasa. Sabab, puasa teh salah sawios sifat Pangeran. Oge dina puasa teh aya dua kabagjaan dunya katut akherat sakaligus. Kitu numutkeun hadits: 

 

‌لِلصَّائِمِ ‌فَرْحَتَانِ: فَرْحَةٌ عِنْدَ فِطْرِهِ، وَفَرْحَةٌ عِنْدَ لِقَاءِ رَبِّهِ

 

Hartosna, “Keur jalmi anu puasa aya dua kabagjaan. Kabagjaan nalika buka sareng kabagjaan nalika pendak sareng Pangeranna,” (HR. Muslim). 

 

Ku hal sakitu, lakonan puasa kalayan leres-leres. Geura bersihkeun awak. Geura sucikeun hate supaya urang tiasa pendak sareng Nu Maha Suci. Kade puasa urang ukur kenging lapar sareng haus hungkul, tapi kedah tiasa nyambungkeun diri ka Pangeran, sareng tiasa ngawujudkeun tujuan kabungah pendak sareng Pangaeran. 

 

بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ، وَتَقَبَّلَ اللهُ مِنِّيْ وَمِنْكُمْ تِلاَوَتَهُ، إِنَّهُ هُوَ السَّمِيْعُ الْعَلِيْمُ، أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ وَالْمُسْلِمَاتِ فَاسْتَغْفِرُوْهُ إِنّهُ هُوَ الْغَفُوْرُ الرّحِيْمُ

 

Khutbah II

 

اَلْحَمْدُ لِلّٰهِ الَّذِيْ أَمَرَنَا بِاْلاِتِّحَادِ وَاْلاِعْتِصَامِ بِحَبْلِ اللهِ الْمَتِيْنِ. أَشْهَدُ أَنْ لَا إِلَهَ إِلَّا اللهُ وَحْدَهُ لَاشَرِيْكَ لَهُ، إِيَّاهُ نَعْبُدُ وَإِيَّاهُ نَسْتَعِيْنُ. وَأَشْهَدُ أَنَّ مُحَمَّدًا عَبْدُهُ وَرَسُوْلُهُ، اَلْمَبْعُوْثُ رَحْمَةً لِلْعَالَمِيْنَ. اِتَّقُوا اللهَ مَا اسْتَطَعْتُمْ وَسَارِعُوْا إِلَى مَغْفِرَةِ رَبِّ الْعَالَمِيْنَ. إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ، يَاأَيُّهَا الَّذِيْنَ ءَامَنُوْا صَلُّوْا عَلَيْهِ وَسَلِّمُوْا تَسْلِيْمًا. اَللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِهِ وَأَصْحَابِهِ أَجْمَعِيْنَ

 

اَللَّهُمَّ اغْفِرْ لِلْمُؤْمِنِيْنَ وَالْمُؤْمِنَاتِ وَالْمُسْلِمِيْنَ وَالْمُسْلِمَاتِ اَلاَحْيَاءِ مِنْهُمْ وَالْاَمْوَاتِ إِنَّكَ سَمِيْعٌ قَرِيْبٌ مُجِيْبُ الدَّعَوَاتِ وَيَا قَاضِيَ الْحَاجَاتِ بِرَحْمَتِكَ يَا اَرْحَمَ الرَّحِمِيْنَ، اَللَّهُمَّ يَا مُيَسِّرَ كُلِّ عَسِيْرٍ ، وَيَا جَابِرَ كُلِّ كَسِيْرٍ ، وَيَا صَاحِبَ كُلِّ فَرِيْدٍ ، وَيَا مُغْنِيَ كُلِّ فَقِيْرٍ، وَيَا مُقَوِّيَ كُلِّ ضَعِيْفٍ، وَيَا مَأْمَنَ كُلِّ مَخِيْفٍ، يَسِّرْ عَلَيْنَا كُلَّ عَسِيْرٍ، فَتَيْسِيْرُ الْعَسِيْرِ عَلَيْكَ يَسِيْرُ، حَاجَاتُنَا إِلَيْكَ كَثِيْرٌ، رَبَّنَا آتِنَا فِي الدُّنْيَا حَسَنَةً وَفِي الآخِرَةِ حَسَنَةً وَقِنَا عَذَابَ النَّارِ

 

عِبَادَ اللهِ، إِنَّ اللهَ يَأْمُرُ بِالْعَدْلِ وَاْلإِحْسَانِ وَإِيتَآئِ ذِي الْقُرْبَى وَيَنْهَى عَنِ الْفَحْشَآءِ وَالْمُنكَرِ وَالْبَغْيِ يَعِظُكُمْ لَعَلَّكُمْ تَذَكَّرُوْنَ. فَاذْكُرُوا اللهَ الْعَظِيْمَ يَذْكُرْكُمْ وَادْعُوْهُ يَسْتَجِبْ لَكُمْ وَلَذِكْرُ اللهِ أَكْبَرُ

 

M. Tatam Wijaya, Penyuluh dan Petugas KUA Sukanagara-Cianjur, Jawa Barat.