Khutbah Jumat Bahasa Sunda: Islam Agama Nu Nanjeurkeun Kadameyan jeung Kamanusaan 

Kedamaian dan keselamatan adalah dambaan semua orang, maka Islam hadir sebagai agama yang membawa ajaran damai yang senantiasa menjunjung tinggi nilai-nilai kemanusiaan. Kedamaian bisa menjadi wasilah untuk meraih kebahagiaan di dunia maupun di akhirat.

 

Teks khutbah Jumat berikut ini dengan judul "Khutbah Jumat Bahasa Sunda:Islam Agama Nu Nanjeurkeun Kadameyan jeung Kamanusaan". Untuk mencetak naskah khutbah Jumat ini, silakan klik ikon print berwarna merah di atas atau bawah artikel ini (pada tampilan desktop). Semoga bermanfaat!

 

Khutbah I

 

اَلْحَمْدُ لِلّٰهِ الَّذِي شَرَحَ صُدُوْرَ الْمُوَفَّقِيْنَ بِأَلْطَافِ بِرِّهِ وَآلَائِهِ، وَنُوْرِ بَصَائِرِهِمْ بِمُشَاهَدَةِ حُكْمِ شَرْعِهِ وَبَدِيْعِ صَنْعِهِ وَمُحْكَمِ آيَاتِهِ، وَأَلْهَمَهُمْ كَلِمَةَ التَّقْوَى، وَكَانُوا أَحَقَّ بِهَا وَأَهْلَهَا، فَسُبْحَانَهُ مَنْ إِلَهٌ عَظِيْمٌ، وَتَبَارَكَ مَنْ رَبٌ وَاسِعٌ كَرِيْمٌ، وَأَشْهَدُ أَن لَا إِلَهَ إِلَّا اللهُ وَحْدَهُ لَا شَرِيْكَ لَهُ، فِي أَسْمَائِهِ، وَصِفَاتِهِ، وَأَفْعَالِهِ، وَخَيْرَاتِهِ، وَأَشْهَدُ أَنَّ مُحَمَّدًا عَبْدُهُ وَرَسُوْلُهُ، أَشْرَفُ رُسُلِهِ وَخَيْرِ بَرِيَاتِهِ، اَللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ وَعَلَى آلِهِ وَأَصْحَابِهِ فِي غَدَوَاتِ الدَّهْرِ وَرُوحَاتِهِ. 
قَالَ اللهُ تَعَالَى فِي الْقُرْآنِ الْكَرِيْمِ وَهُوَ أَصْدَقُ الْقَائِلِيْنَ أَعُوْذُ بِاللهِ مِنَ الشَّيْطَانِ الرَّجِيْمِ ، يَٰٓأَيُّهَا ٱلَّذِينَ ءَامَنُواْ ٱدْخُلُواْ فِى ٱلسِّلْمِ كَآفَّةً وَلَا تَتَّبِعُواْ خُطُوَٰتِ ٱلشَّيْطَٰنِ  إِنَّهُۥ لَكُمْ عَدُوٌّ مُّبِينٌ،  وَقَالَ النَّبيُّ صَلَّى اللهِ علَيْهِ وَسَلَّمَ ، الْمُسْلِمُ مَنْ سَلِمَ الْمُسْلِمُونَ مِنْ لِسَانِهِ وَيَدِهِ ،صَدَقَ اللهُ الْعَظِيْمُ وَصَدَقَ رَسُوْلُهُ الْحَبِيْبُ الْكَرِيْمُ وَنَحْنُ عَلَى ذَلِكَ مِنَ الشَّاهِدِيْنَ وَالشَّاكِرينَ وَالْحَمْدُ للهِ رَبِّ الْعَالَمِيْنَ، أَمَّا بَعْدُ

 

Hadirin sidang Jumah anu mulya 
Langkung ti payun hayu urang sami-sami manjatkeun puji kalih syukur ka Alloh Robbun Gofur. Dzat anu teu liren-liren ngalimpahkeun ni’mat ka urang sadayana, kalebet ni’mat taufik-hidayah sareng nikmat berjamaah. Sahingga dina waktos anu mulya ieu, urang sadayana tiasa sasarengan ngalaksanakeun salah sawios parentah-Na, nyaeta solat Jumah.  

 

Solawat sareng salam anu sampurna mugi salamina dikucurkeun ka Panutan Alam, nyaeta Kangjeng Nabi Muhammad saw. Solawat sareng salam anu utama oge mugi dilimpahkeun ka para sahabatna, para tabi’in, tabi’ tabi’in, dugika urang sadayana salaku umatna. Mudah-mudahan urang sadayana kenging taufiq hidayah kanggo tumut kana ajaran mantenna kalayan di akherat kenging syafaatna. Amin ya robbal alamin.

 

Sidang Jumah rohimakumulloh  
Sateuacan ngalajengkeun ieu khutbah, sakumaha biasa, khotib seja wasiat khusus ka diri pribadi, umum ka sidang Jumah sadayana, hayu urang sami-sami ningkatkeun kaimanan oge katakwaan ka Alloh swt. Sabab, takwa teh pang hade-hadena bekel urang, terutami bekel mayunan kahirupan lana akherat namina anu disebat alam panjang poe padang nagara tanjung sampurna. 

 

Kadua kalina, urang manjatkeun rasa syukur nu taya hinggana ka Alloh Dzat nu murbeng alam, rehing urang sadayana dina waktos ieu aya dina kaayaan ayem tengtrem tur lugina nu taya padanna. Ku kituna hayu urang soson-soson nyukuran ni’mat ieu, ku ngalaksanakeun ibadah oge kumaula ka Allah swt, samemeh kasempetan berharga ieu leungit ti diri urang sadayana. 

 

Kanggo langkung ningkatkeun rasa syukur eta, cobi urang tingal dulur-dulur urang nu aya di Palestina. Kumaha kaayaan aranjeuna ayeuna. Hirup kadungsang-dungsang dibayang-bayang kapaur, karisi, jeung karempan mayunan serangan lawan. Estu teu aya kajongjonan pisan nalika ngajalankeun ibadah nyakitu deui aktivitas sejenna. 

 

Sawalerna urang di Indonesia mah nuju dina katengtreman sareng pohara luginana sapertos ayeuna, piraku teu rek disyukuran ku urang, piraku ieu kasempetan teh teu rek dieusian ku rupa-rupa ibadah jeung ngabakti ka Pangeran? Asa kabina-bina, batur mah katingal masih nyempetkeun ibadah jeung ngaos Al-Quran sanajan dina kaayaan darurat perang, piraku urang teu rek nyempetkeun ibadah pisan bari dina kaayaan aman jeung lugina?

 

فَبِأَيِّ آلاءِ رَبِّكُمَا تُكَذِّبَانِ 

 

Ni’mat Allah anu mana deui nu rek dibohongkeun ku urang? 

 

Ngan mudah-mudahan wae, ewuh pakewuh nu dirandapan ku dulur-dulur urang di Palestina sing saengalna rengse. Sing sapapaosna Allah maparin kasalametan oge kameunangan ka aranjeuna. Allah saengalna ngalungsurkeun kadameyan ka aranjeuna. Sabab, teu aya senjata nu tiasa dianggo ku urang salian ti doa sareng ngumpulkeun sasieureun sabeunyeureun rezeki keur ngaringankeun katalangsaraan aranjeuna. Sakumaha dawuhan Allah:

 

وَمَا رَمَيْتَ إِذْ رَمَيْتَ وَلَٰكِنَّ اللَّهَ رَمَىٰ ۚ وَلِيُبْلِيَ الْمُؤْمِنِينَ مِنْهُ بَلَاءً حَسَنًا ۚ إِنَّ اللَّهَ سَمِيعٌ عَلِيمٌ 

 

Hartosna: “Sanes anjeun anu mabet nalika anjeun mabet, tapi Allah anu mabet. Saenya-enyana Allah maparin ujian ka jalma-jalma anu arman mangrupa ujian anu hade.” (QS. Al-Anfal [8]: 17). 

 

Mudah-mudahan, bangsa Palestina sing kenging pitulung Allah, oge musuh-musuh aranjeuna sing buburu dielehkeun ku Allah. Sabab, teu aya sesahna kanggo Alloh. Nalika tos dikersakeun, sakumaha kuatna lawan pasti kaelehkeun. Sanajan numutkeun zohir perang kurang saimbang, nanging nalika Allah parantos ngersakeun, pasti maparin kakuatan jeung kameunangan. 

 

Sabab, yakin jeung tetela, gempuran jeung serangan ka kota Gaza di Palestina, bener-bener kajadian anu tos ngarampas kadameyan sareng kamanusaan. Bener-bener jauh jeung sumanget agama Islam anu ngajungjung kadameyan, kasalametan, sareng sikap ramah tur toleran.

 

Hadirin sidang Jumah anu mulya 
Peryogi kauninga, salian ti ngabogaan makna ‘pasrah’ sareng ‘tumarima’, islam mah ngabogaan makna ‘damey’, ‘salamet’, ‘aman’, tur ‘tengtrem’. Anu sadayana ieu ngacu kana kaaayan anu didambakeun ku satiap jalma. Lain ukur ku umat Islam, tapi ku sadayana umat manusia di mana wae ayana, sareng sadayana makhluk kaasup hewan jeung tutuwuhan. 

 

Salajengna, secara konsep, Islam mangrupakeun agama anu ngajarkeun monoteisme tauhid anu kudu diwujudkeun dina bentuk kepasrahan diri sareng kataatan ka Allah sareng rosul-Na salaku utusan anu nyandak rohmat keur ngaraih kabagjaan jeung kaselamatan, dunya katut akheratna. 

 

Nanging, kabagjaan eta moal tiasa ngawujud tanpa kadameyan sareng kaasih di antara sasama. Intina, ngalangkungan misi kadameyan sareng kaasih, risalah Islam diturunkeun ka sadayana alam.  

 

Jauh jeung agama sejen, Islam mah pinuh ku ajaran kadameyan.
Salami ieu, damey masih dipahami ku hirup rukun dampingan antara dua pihak atawa dua kakuatan gede anu mumusuhan. Padahal, nyatanya henteu kitu. Dina Islam mah, jiwa jeung individu umat teh diciptakan keur damey jeung tengteram, anu duanana mangrupakan kabutuhan dasar. Cobi tingal ku urang, sarengkak saparipolah, kalebet dina ibadah, urang diparentah rintih, tartib, khusyu’ sareng tenang. Teu meunang buru-buru, salian cara buru-buru jeung gurunggusuh teh datangna ti setan.  

 

Dina muamalah sareng Allah atanapi hablum minallah, misalna, urang diparentah zikir ka Mantenna, anu salah sahiji tujuanna nyaeta nyiptakeun jiwa anu damey jeung tengtrem, sakumaha anu diuningakeun dina Al-Quran surah Ar Ra’du ayat 28:

 

الَّذِيْنَ اٰمَنُوْا وَتَطْمَىِٕنُّ قُلُوْبُهُمْ بِذِكْرِ اللّٰهِۗ اَلَا بِذِكْرِ اللّٰهِ تَطْمَىِٕنُّ الْقُلُوْبُۗ 

 

Hartosna: “Nyaeta jalma-jalma nu iman jeung hate maranehna jadi tengtrem ku emut ka Allah. Inget yen mung ku emut ka Allah hate bakalan tengtrem,”

 

Teras deui, nalika midamel shalat, urang diwajibkeun ngalaksanakeunnana dibarengan ku tuma’ninah alias tenang sareng teu buru-buru. Di akhir shalat, urang diwajibkeun ngaos salam anu maknana teu aya deui anging kadameyan sareng kasalametan. 

 

Saatos solat, urang dianjurkeun ngadua, di antara doa ku urang dilantunkeun nyaeta doa selamet sareng doa kasalametan, allahumma antassalam waminkassalam.... Oge masih seueur deui tradisi anu teu bisa dileupaskan tina sumangat kadameyan sareng keselamatan. Malahan, engke di akhirat, anu bakal dipanggil ku Allah lebet surga teh nyaeta kelompok hamba anu jiwa-jiwana damai jeung tenang, sakumaha anu diuningakeun dina surah al-Fajr ayat 27 dugika ayat 30.

 

يَا أَيَّتُهَا النَّفْسُ الْمُطْمَئِنَّةُ ارْجِعِي إِلَىٰ رَبِّكِ رَاضِيَةً مَرْضِيَّةً

 

Hartosn:“He jiwa anu tenang, balik anjeun ka pangeran anjeun kalawan nyandak hate anu rido jeung dipika rido,” (QS. Al-Fajr [89]: 27-30). 

 

Hadirin Sidang Jumah Anu Dimulyakeun ku Allah, 
Nyakitu deui dina muamalah jeung papada jalma, atanapi nu disebat hablum minannas, dua insan laki-laki sareng awewe dibeungkeut ku tali pernikahan, tujuanna teu aya deui keur ngabina kuluarga anu sakinah, mawaddah, wa rahmah, alias keluarga yang pinuh ku katengtreman, kacintaan, kadeudeuh sareng kadeudeuh, sakumaha anu dibeberkeun dina surah Ar-Rum ayat 21.

 

وَمِنْ اٰيٰتِهٖٓ اَنْ خَلَقَ لَكُمْ مِّنْ اَنْفُسِكُمْ اَزْوَاجًا لِّتَسْكُنُوْٓا اِلَيْهَا وَجَعَلَ بَيْنَكُمْ مَّوَدَّةً وَّرَحْمَةًۗ اِنَّ فِيْ ذٰلِكَ لَاٰيٰتٍ لِّقَوْمٍ يَّتَفَكَّرُوْنَ

 

Hartosna: “Di antawis tanda kakawasaan Alloh nyaeta Mantenna nyiptakeun pasangan-pasangan keur aranjeun tina jinis aranjeun sorangan, supaya aranjeun ngaraos tengtrem ka anjeunna. Oge Mantenna ngajantenkeun rasa kadeudeuh jeung kanyaah di antara aranjeun. Saenya-enyana, dina sadaya eta aya tanda-tanda kakawasaan (Alloh) keur kaum anu nganggo akal pikirna.”

 

Saterasna, di antara papada muslim oge diwajibkeun ngawangun duduluran supaya tercipta rasa deukeut, kakuatan, sareng keharmonisan. Dina lingkup anu langkung luas, urang oge diajarkan saling hormat sareng saling hargaan kayakinan supaya tercipta karukunan di antara sasama umat beragama, sakumaha anu dijelaskeun dina surah Al-Kafirun ayat 6.

 

لَكُمْ دِيْنُكُمْ وَلِيَ دِيْنِࣖ 

 

“Agama anjeun keur anjeun, agama kuring keur kuring”

 

Masih dina raraga hablum minnas, Islam oge parantos ngajarkan ka urang sadayana supaya nebarkeun salam atanapi ucapan as-salamu‘alaikum, imma nalika namu, paamprok, jabat tangan, atanapi ngawitan sareng nutup cariosan formal. 

 

Ngabahas ajaran, rujukannana tangtos Al-Quran sareng Sunnah. Dina Al-Quran, kecap salam, sareng turunanana, disebatkeun teu kirang ti 120 kali, anu salah sahijina jadi asma Allah, as-Salam anu hartosna Dzat anu Maha Masihan Kaselamatan sareng Kedamaian. Ieu nunjukkeun, Allah teh sumber kedameyan sareng kasalametan, anu ngwajibkeun para hamba-Na ngengingkeun duanana. Alhasil, dumasar kaimanan sareng kanyaah, Islam banget nekenkeun pentingna mikanyaah sasama, bahkan sasama makhluk, supaya tercipta kadameyan sareng keselamatan di dunia sareng akhirat.

 

Nyakitu keneh dina hadis sareng Sunah Rasulullah. Kalintang seueur hadis anu ngajarkeun hirup damey sareng ngutamakeun kasalametan. Malahan salah sawiosna nguningakeun, jalma muslim teh jalma anu ngajadikeun muslim sejenna salamet tina lisan sareng leungeunna, sakumaha hadis di handap.  

 

 المُسْلِمُ مَن سَلِمَ المُسْلِمُونَ مِن لِسانِهِ ويَدِهِ 

 

Hartosna: “Ari jalma muslim teh nyaeta jalma anu jalma-jalma muslim sanesna salamet tina gangguan lisan sareng leungeunna,” (HR. al-Bukhari).

 

Ku hal sakitu, mugia urang sadayana tiasa mahami oge ngajalankeun ajaran damey anu parantos diajarkeun ku agama Islam. Sahingga urang leres-leres nyepeng eta ajaran ku cara kaffah, sakumaha dina Surat Al-Baqoroh ayat 208: “Arasup anjeun kana agama Islam ku cara kafah,”.

 

Mudah-mudahan di akherat urang oge kalebet jalma anu kenging kadameyan sareng kasalametan kalawan kawaris darus salam negeri surga anu aman tur tengtrem salami-lamina. Amin ya robbal alamin. 

 

بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ، وَتَقَبَلَّ اللهُ مِنِّيْ وَمِنْكُمْ تِلاَوَتَهُ، إِنَّهُ هُوَ السَّمِيْعُ الْعَلِيْمُ، أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ وَالْمُسْلِمَاتِ فَاسْتَغْفِرُوْهُ إِنّهُ هُوَ الْغَفُوْرُ الرّحِيْمِ

 

Khutbah II

 

اَلْحَمْدُ لِلّٰهِ الَّذِيْ أَمَرَنَا بِاْلاِتِّحَادِ وَاْلاِعْتِصَامِ بِحَبْلِ اللهِ الْمَتِيْنِ. أَشْهَدُ أَنْ لاَ إِلَهَ إِلاَّ اللهُ وَحْدَهُ لاَشَرِيْكَ لَهُ، إِيَّاهُ نَعْبُدُ وَإِيَّاُه نَسْتَعِيْنُ. وَأَشْهَدُ أَنَّ مُحَمَّدًا عَبْدُهُ وَرَسُوْلُهُ، اَلْمَبْعُوْثُ رَحْمَةً لِلْعَالَمِيْنَ. اَللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِهِ وَأَصْحَابِهِ أَجْمَعِيْنَ. اِتَّقُوا اللهَ مَا اسْتَطَعْتُمْ وَسَارِعُوْا إِلَى مَغْفِرَةِ رَبِّ الْعَالَمِيْنَ. إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ، يَاأَيُّهاَ الَّذِيْنَ ءَامَنُوْا صَلُّوْا عَلَيْهِ وَسَلِّمُوْا تَسْلِيْمًا. وَصَلَّى الله عَلَى سَيِّدَنَا وَمَوْلَانَا مُحَمَّدٍ وَعَلَى آلِهِ وَصَحْبِهِ وَسَلَّمَ

 

اَللَّهُمَّ اغْفِرْ لِلْمُؤْمِنِيْنَ وَالْمُؤْمِنَاتِوَالْمُسْلِمِيْنَ وَ الْمُسْلِمَاتِ اَلاَحْيَاءِ مِنْهُمْ وَالْاَمْوَاتْ إِنَّكَ سَمِيْعٌ قَرِيْبٌ مُجِيْبُ الدَّعَوَاتِ وَيَا قَاضِيَ الْحَاجَاتِ بِرَحْمَتِكَ يَا اَرْحَمَ الرَّحِمِيْنَ

 

اللَّهُمَّ إِنَّا نَعُوذُ بِكَ مِنْ عَذَابِ جَهَنَّمَ وَنَعُوذُ بِكَ مِنْ عَذَابِ الْقَبْرِ وَنَعُوذُ بِكَ مِنْ فِتْنَةِ الْمَسِيحِ الدَّجَّالِ وَنَعُوذُ بِكَ مِنْ فِتْنَةِ الْمَحْيَا وَالْمَمَاتِ، اللَّهُمَّ إِنَّا نَعُوذُ بِكَ مِنْ الْهَمِّ وَالْحَزَنِ وَنَعُوذُ بِكَ مِنْ الْعَجْزِ وَالْكَسَلِ وَ نَعُوذُ بِكَ مِنْ الْجُبْنِ وَالْبُخْلِ وَنَعُوذُ بِكَ مِنْ غَلَبَةِ الدَّيْنِ وَقَهْرِ الرِّجَالِ ، رَبَّنَا آتِنَا فِي الدُّنْيَا حَسَنَةً وَفِي الآخِرَةِ حَسَنَةً وَقِنَا عَذَابَ النَّارِ

 

عِبَادَ اللهِ، إِنَّ اللهَ يَأْمُرُكُمْ بِالْعَدْلِ وَاْلإِحْسَانِ وَإِيتَآئِ ذِي الْقُرْبَى وَيَنْهَى عَنِ الْفَحْشَآءِ وَالْمُنكَرِ وَالْبَغْيِ يَعِظُكُمْ لَعَلَّكُمْ تَذَكَّرُوْنَ. فَاذْكُرُوا اللهَ الْعَظِيْمَ يَذْكُرْكُمْ وَادْعُوْهُ يَسْتَجِبْ لَكُمْ وَلَذِكْرُ اللهِ أَكْبَرُ

 

Ustadz M Tatam Wijaya, Penyuluh dan Petugas KUA Sukanagara-Cianjur, Jawa Barat.