Khutbah Jumat Bahasa Minang: Awal Mulo Kurban, Sajarah Sarato Hikmahnyo 

Ibadah kurban merupakan ibadah yang dianjurkan dalam Islam kepada orang yang mampu untuk menunaikannya. Kurban pertama kali dilaksanakan oleh anak-anak Nabi Adam as, Habil dan Qabil. Namun hanya kurban Habil yang diterima oleh Allah Swt. 

Teks khutbah Jumat berikut ini mengajak kepada para jamaah memetik hikmah besar dari kurban anak-anak Nabi Adam as. Adapun tema khutbah adalah “Khutbah Jumat Bahasa Minang: Awal Mulo Kurban, Sajarah sarato Hikmahnyo”. Untuk mencetak naskah khutbah Jumat ini, silakan klik ikon print berwarna merah di atas atau bawah artikel ini (pada tampilan desktop). Semoga bermanfaat.

---

Khutbah I

اَلْحَمْدُ لِلّٰهِ ذِي الْجَلَالِ وَالْإِكْرَامِ، الَّذِيْ أَعَزَّنَا بِالْإِسْلَامِ، وَأَكْرَمَنَا بِالْإِيْمَانِ، وَنَوَّرَ قُلُوْبَنَا بِالْقُرْاٰنِ، أَشْهَدُ أَنْ لَا اِلَهَ إِلَّا الله وَحْدَهُ لا شَرِيك لَه، ذُو اْلجَلالِ وَالإكْرام، وَأَشْهَدُ أَنّ سَيِّدَنَا وَنَبِيَّنَا مُحَمَّدًا عَبْدُهُ وَ رَسولُه. اللّٰهُمَّ صَلِّ وَسَلِّمْ عَلَى سَيِّدِنَا مُحَمَّدٍ، وَعَلَى أٰلِهِ وَصَحْبِهِ وَمَنْ وَالاَهُ . أَمَّابَعْدُ؛ فَيَآ أَيُّهَا النَّاسُ، اتَّقُوا اللهَ حَقَّ تَقْوَاهُ كَمَا قَالَ تَعَالَى: يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ.

قَالَ اللهُ تَعَالَى فِي كِتَابِهِ الْكَرِيْمِ، أَعُوْذُ بِاللهِ مِنَ الشَّيْطَانِ الرَّجِيْمِ، بِسْمِ اللهِ الرَّحْمَنِ الرَّحِيْمِ، فَصَلِّ لِرَبِّكَ وَانْحَرْۗ صَدَقَ اللهُ الْعَظِيْمِ

Kaum muslimin wal muslimat sidang jamaah Jumaik nan dimuliakan dek Allah SWT

Awal kalam bamulo kato, tiado kato nan patuik taucap di lisan kito, tiado syair nan labiah indah untuak kito dendangkan, malainkan mamuji dan mamuja Allah SWT. Kareno barakaik rahmat jo karunia Baliau, kito bisa malakukan aktivitas sahari-sahari. Ado nan ka parak, ado nan manggaleh dan ado pulo nan karajo di kantua. 

Namun Allah agiah nikmaik lain kapado kito basamo, yaitu nikmaik kaimanan, sahinggo tagarak hati kito untuak mamanuahi panggilan Alllah untuak manunaikan ibadah Jumaik sacaro bajamaah. Tantangan  pado itu kaum muslimin, marilah kito basamo-samo basyukur mangucapkan alhamdulillahirabbil’alamiin, sagalo puji hanyo untuak Allah SWT.

Kamudian dari pado itu kaum muslimin, shalawaik barangkaikan salam, marilah sanantiaso kito basalawaik kapado junjungan alam, yaitu Nabi Muhammad SAW. Allaahumma shalli ‘alaa sayyidina Muhammad wa ‘ala aali sayyidinaa Muhammad. Kito samo-samo baharap dangan salawaik nan salalu mambasahi lidah jo bibia kito, mudah-mudahan kito dinobaikkan sabagai umaik nan barhak mandapek syafaat baliau di yaumil qiyamah nanti.

Kaum muslimin, khatib indak akan bosan-bosan mangajak kaum muslimin dan kaum muslimat, tarutamo kapado diri khatib pribadi, untuak sanantiaso maningkekkan katakwaan kito kapado Allah SWT. Yaitu dengan caro mangarajokan sagalo parintah dari Allah SWT dan maninggalkan sagalo bantuak larangan Baliau.

Kaum muslimin wal muslimat sidang jamaah Jumaik nan dimuliakan dek Allah SWT

Wukatu bajalan taraso capek. Alun lamo rasonyo kito marayokan hari rayo idul fitri, sabanta lai kito lah ka batamu pulo jo hari rayo Idul Adha. Kini kito lah barado di bulan Zulhijjah. Katiko alah masuak bulan Dzulhijjah, sabagian umaik Islam sibuk manunaikan rangkaian ibadah haji di Makah. Samantaro umaik Islam nan alun dibari kasampatan untuak pai ka tanah suci, banyak pulo nan sibuk jo manyiapkan pitih untuak ka pambali hewan kurban. Bagitu pulo babarapo panguruih masajik jo lembaga sosial juo sibuk mambali bantiang ataupun kambiang untuak ka didabiah di hari rayo.

Hari rayo Idul Adha disampiang tanamo jo rayo aji, banyak pulo nan manamokannyo jo rayo kurban. Kareno di hari rayo ko kito disyariaikkan untuak manunaikan ibadah kurban bagi nan mampu. Ibadah kurban marupokan ibadah nan dianjurkan dalam agamo Islam. Parintah Allah Swt kapado Nabi Muhammad Saw untuak bakurban diabadikan dek Allah Swt di dalam surek al-Kausar ayaik duo nan babunyi:

فَصَلِّ لِرَبِّكَ وَانْحَرْۗ

“Mako karajokanlah sumbayang karno Tuhan Engkau, bakurbanlah.” (QS Al Kautsar: 3)

Ibadah kurban marupokan ibadah nan sunnah muakkad hukumnyo bagi umaik Islam nan mampu. Hal iko sabagaimano dijalehkan di dalam kitab Fathul Qarib halaman 311 barikuik:

(والأضحية سنة مؤكدة( على الكفاية؛ فإذا أتى بها واحد من أهل بيت كفى عن جميعهم. ولا تجب الأضحية إلا بالنذر

“Dan Berkurban hukumnyo sunnah muakkaik ateh jalan kifayah; apobilo salah surang dari anggota kaluarga alah menunaikannyo, mako itu alah cukuik untuak anggota kaluarga nan lain. Dan kurban indak manjadi wajib kecuali jikok dinazarkan.”

Kaum muslimin sidang jamaah Jumaik nan dimuliakan Allah Swt.

Ibadah kurban indak hanyo baguno untuak maningkekkan raso paduli kito ka urang lain, tapi ado ciek hikmah nan acok kali kito lupo satantangan kurban ko. Yaitu hikmah dari sajarah disyariaikkan nyo kurban kapado kito basamo. 

Sajarah kurban bamulo dari kisah keluarga Nabi Adam as. Imam al-Qurthubi dan Syekh Nawawi al-Bantani dalam kitab tafsirnyo masiang-masiang lah manjalehkan bahwasonyo Sabagaimano kito katahui basamo-samo, bahwasonyo Nabi Adam as dibarikan karunia nan luar biaso dek Allah Swt barupo anak kamba nan bapasang-pasangan. Lalu Allah Swt manyuruah Nabi Adam As untuak manikahkan anak-anaknyo jo dunsanaknyo nan bukan dunsanak kambanyo, Habil jo Iqlima dan Qabil jo Lluyutsa. Namun sayangnyo rancana ko indak bajalan sasuai rancana. Rupo Iqlima nan labiah manawan mambuek Qabil iri dan manantang parintah Tuhan ko.

Nabi Adam as bakato kapado Qabil, “Oi anak den, Allah nan manyuruah Angkau untuak mangarajokan ko mah,”

“Indak ado gai Allah Manyuruah iko do. Iko aka-aka Ayah samiang ko nyo.” Bantah Qabil ka ayahnyo. Qabil tatok basikareh nio manikah jo Iqlima jo daliah inyo tu dunsanak kambanyo. Karno janin nyo baduo samo-samo tumbuah di rahim Hawa.

Lalu Nabi Adam as mangadokan sayambara, sia nan manang inyo lah nan barhak nikah jo Iqlima. Sayambaranyo tu adolah bakurban.  “Sia nan kurbannyo ditarimo, inyolah nan barhak nikah jo Iqlima.” Kato Nabi Adam as.

Kaum muslimin sidang jamaah Jumaik nan dimuliakan Allah Swt.

Habil ko adolah tukang gambalo, jadi wajar sajo kok nyo bisa bakurban jo taranak nan rancak, yaitu kambiang. Samantaro Qabil hanyolah saurang urang ka parak, nyo mangutamokan kurbannyo jo hasil panennyo.

Katiko lah tibo ari nan dijanjikan, yaitu di sabuah gunuang, kaduonyo tibo mambaok kurbannyo surang-surang. Habil mambaok kambiang nan rancak. Samantaro Qabil mambaok hasil panen nan paliang buruak. Kamudian badoa ka Allah Swt. Indak lamo sasudah itu, tibolah api ka kurban Habil lalu dibaoknyo ka ateh langik. Samantaro kurban Qabil ndak ado nan manyantuah saketek pun sampai di makan dek binantang buas.

Itu artinyo kurban Habil lah nan lai ditarimo dek Allah Swt. Sadangkan kurban Qabil indak ditarimo. Mancaliak iko, Qabil pun indak namuah manarimo jo lapang dado. Raso iri ka Habil justru malah manjadi-jadi. Sampai pado akhianyo marancanokan untuak mambunuah Habil. Sahinggo Qabil manjadi urang nan partamu kali manumpahkan darah di ateh dunia ko. Kisah ko kaum muslimin sacaro singkek diabadikan dek Allah Swt di dalam firman-Nyo nan babunyi:

 وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَانًا فَتُقُبِّلَ مِنْ أَحَدِهِمَا وَلَمْ يُتَقَبَّلْ مِنَ الْآخَرِ قَالَ لَأَقْتُلَنَّكَ ۖ قَالَ إِنَّمَا يَتَقَبَّلُ اللَّهُ مِنَ الْمُتَّقِينَ

“Caritokanlah kapado Bani Israil tu kisah duo anak Adam (Habil jo Qabil) manuruik nan sabananyo, katiko kaduonyo mampasambahkan kurban, mako ditarimo kurban salah surang dari mereka baduo. Dan indak ditarimo nan lain (Qabil). Qabil bakato; ‘Den bunuah kau’ Habil bakato: “Sasungguahnyo Allah hanyo kan manarimo (kurban) dari urang-urang nan batakwa.” (QS al-Maidah: 27)

Kambiang Habil nan diangkek ka ateh langik kamudian digambalokan di sarugo. Ratuihan tahun sudah tu, kambiang itulah nan manjadi ganti kurban Nabi Ibrahim as katiko handak mandabiah anaknyo Nabi Ismail as.

Kaum muslimin sidang jamaah Jumaik nan dimuliakan dek Allah Swt

Sasudah kito simak kisah ko, mako kito akan bisa manamui hikmah dari apo nan tajadi kapado anak-anak Nabi Adam as. Hikmah iko sangaik arek jo parsiapan awak sabalun bakurban. Di kisah tadi dijalehkan bahwasonyo kurban Habil ditarimo dek Allah Swt karno kurban nan nyo barikan marupokan nan paliang rancak dari nan nyo punyo. Indak nan buruak maupun nan sakik. Sahinggo iko akhianyo manjadi syariat untuak Nabi Muhammad Saw untuak bakurban jo kurban nan paliang segeh. Dan indak sah kurban kito kalau kito bakurban jo taranak nan kuruih ataupun sakik. Hal iko dijalehkan dek Imam Nawawi dalam al-Majmu’ jilid 8 halaman 404 sabagai barikuik:

أجمعوا على أن العمياء لا تجزئ وكذا العوراء البين عورها والعرجاء البين عرجها والمريض البين مرضها والعجفاء واختلفوا في ذاهبة القرن ومكسورته فمذهبنا أنها تجزئ

“Para ulama sapakaik bahwasonyo hewan kurban nan buto indak sah dijadikan untuk ibadah kurban, baitu pulo hewan nan buto sabalah matonyo, damikian pulo hewan nan tengkak nan jaleh nampak pincangnyo, mantun pulo hewan nan jaleh nampak sakiknyo sarato hewan nan kuruih. Adopun para ulama babeda pandapek pakaro tanduak hewan nan hilang dan rusak. Dalam mazhab Syafii sah.”

Kaum muslimin sidang jamaah Jumaik nan dimuliakan Allah Swt

Katiko kito mancaliak baa wujuik kurban nan dipasambahkan dek Habil tadi, kito akan dapek pahami bahwasonyo batapo ikhlasnyo Habil dalam bakurban. Hal iko paralu juo jadi inuak manuang dan paratian kito basamo. Jan sampai kito bakurban itu karno hanyo ingin dipandang dek urang banyak. Bia bisa dikatokan paliang taat dan shaleh. Tapi barikan hewan kurban nan paliang ancak dan niaikkan ikhlas karno Allah Swt. Karno kunci dari ibadah itu adolah tagantuang niaik. 

Katiko niaik kito samato-mato kapado Allah, mako kito akan mandapek ridho jo rahamat Allah. Namun kok kito bakurban supayo dicaliak urang atau sabagai ajang kampanye, mako hanyo itu nan akan kito dapek, kito indak akan mandapekkan balasan dari Allah Swt.

Rasulullah Saw bersabda:

إِنَّمَا الأَعْمَالُ بِالنِّيَّاتِ، وَإِنَّمَا لِكُلِّ امْرِئٍ مَا نَوَى، فَمَنْ كَانَتْ هِجْرَتُهُ إِلَِى اللهِ وَرَسُوْلِهِ فَهِجْرَتُهُ إِلَى اللهِ وَرَسُوْلِهِ، وَمَنْ كَانَتْ هِجْرَتُهُ لِدُنْيَا يُصِيْبُهَا، أَوْ امْرَأَةٍ يَنْكِحُهَا، فَهِجْرَتُهُ إِلَى مَا هَاجَرَ إِلَيْهِ

“Amalan-amalan itu hanyolah tagantuang pado niaiknyo. Dan tiok-tiok urang itu hanyolah akan dibaleh badasarkan apa nan nyo niaikkan, mako siapo sajo nan hijrah kapado Allah dan rasulu-Nyo, maka hijrahnyo kapado Allah dan Rasul-Nyo. Namun sia sajo nan hijrahnyo untuak mandapekkan dunia atau padusi nan nio nyo nikahi, mako hijrahnyo kapado apo nan nyo niaikkan itu.”(HR. Bukhari Muslim)

Hadis ko kaum muslimin manjalehkan bahwasonyo baitu pantiangnyo niaik. Apo nan kito niaikkan, yo itulah nan kito dapek. Jan harok ka mandapek pahalo dari Allah Swt katiko kito bakurban ataupun baibadah lainnyo jo caro riya, ingin dipandang dek urang banyak. Na’uzubillah min zalik

Di akhia katubah ko, khatib sakali lai ingin maingekkan kito basamo bahwasonyo saindaknyo ado duo hikmah dari kisah kurban Habil jo Qabil tadi. Nan partamu, dalam bakurban handak kito maluruihkan niaik karno Allah Swt. Karno katiko kito indak ikhals dalam baibadah ataupun bakurban, mako jan harok bisa mandapek pahalo dari Allah Swt. Justru nan kito dapek adolah laknaik dari Allah Swt karno kito baibadah bukan kapado-Nyo.

Nan kaduo, bakurbanah jo kurban nan paliang rancak. Silahkan piliah hewan kurban nan sihaik, nan babobot dan indak cacat. Kareno katiko hewan kurban kito sakik atau cacat mako itu bisa manjadi salah satu sabab indak ditarimonyo kurban kito dek Allah Swt.

Damikianlah khutbah kito pado saat kini, mudah-mudahan iko bisa manjadi bahan ranuangan dek kito basamo. Mudah-mudahan sagalo doso nan alah kito dipabuek diampuni dek Allah Swt dan tobaik nan kito lakukan ditarimo dek Allah Swt. Aamiin Yaa Rabbal ‘aalamiin.

بَارَكَ اللهُ لِي وَلَكُمْ فِي الْقُرْآنِ الْعَظِيْمِ وَنَفَعَنِي وَاِيِّاكُمْ بما فيه مِنَ الآيَاتِ وَالذِّكْرِ الْحَكِيْمِ. وَتَقَبَّلْ مِنِّيْ وَمِنْكُمْ تِلاوَتَهُ اِنّهُ هُوَ السَّمِيْعُ اْلعَلِيْمُ.. فَاسْتَغْفِرُوْا اِنَّهُ هُوَ اْلغَفُوْرُ الرَّحِيْمُ

Khutbah II

اَلْحَمْدُ للهِ عَلىَ إِحْسَانِهِ وَالشُّكْرُ لَهُ عَلىَ تَوْفِيْقِهِ وَاِمْتِنَانِهِ. وَأَشْهَدُ أَنْ لاَ اِلَهَ إِلاَّ اللهُ وَاللهُ وَحْدَهُ لاَ شَرِيْكَ لَهُ وَأَشْهَدُ أنَّ سَيِّدَنَا مُحَمَّدًا عَبْدُهُ وَرَسُوْلُهُ الدَّاعِى إلىَ رِضْوَانِهِ. اللهُمَّ صَلِّ عَلَى سَيِّدِنَا مُحَمَّدٍ وِعَلَى اَلِهِ وَأَصْحَابِهِ وَسَلِّمْ تَسْلِيْمًا كِثيْرًا أَمَّا بَعْدُ. فَياَ اَيُّهَا النَّاسُ اِتَّقُوااللهَ فِيْمَا أَمَرَ وَانْتَهُوْا عَمَّا نَهَى وَاعْلَمُوْا أَنَّ اللهَ أَمَرَكُمْ بِأَمْرٍ بَدَأَ فِيْهِ بِنَفْسِهِ وَثَـنَى بِمَلآ ئِكَتِهِ بِقُدْسِهِ وَقَالَ تَعاَلَى إِنَّ اللهَ وَمَلآئِكَتَهُ يُصَلُّوْنَ عَلىَ النَّبِى يآ اَيُّهَا الَّذِيْنَ آمَنُوْا صَلُّوْا عَلَيْهِ وَسَلِّمُوْا تَسْلِيْمًا.

 اللهُمَّ صَلِّ عَلَى سَيِّدِنَا مُحَمَّدٍ صَلَّى اللهُ عَلَيْهِ وَسَلِّمْ وَعَلَى آلِ سَيِّدِناَ مُحَمَّدٍ وَعَلَى اَنْبِيآئِكَ وَرُسُلِكَ وَمَلآئِكَةِ اْلمُقَرَّبِيْنَ وَارْضَ اللّهُمَّ عَنِ اْلخُلَفَاءِ الرَّاشِدِيْنَ أَبِى بَكْرٍ وَعُمَر وَعُثْمَان وَعَلِى وَعَنْ بَقِيَّةِ الصَّحَابَةِ وَالتَّابِعِيْنَ وَتَابِعِي التَّابِعِيْنَ لَهُمْ بِاِحْسَانٍ اِلَى يَوْمِ الدِّيْنِ وَارْضَ عَنَّا مَعَهُمْ بِرَحْمَتِكَ يَا أَرْحَمَ الرَّاحِمِيْنَ .

 اَللهُمَّ اغْفِرْ لِلْمُؤْمِنِيْنَ وَاْلمُؤْمِنَاتِ وَاْلمُسْلِمِيْنَ وَاْلمُسْلِمَاتِ اَلاَحْيآءِ مِنْهُمْ وَاْلاَمْوَاتِ اللهُمَّ أَعِزَّ اْلإِسْلاَمَ وَاْلمُسْلِمِيْنَ وَأَذِلَّ الشِّرْكَ وَاْلمُشْرِكِيْنَ وَانْصُرْ عِبَادَكَ اْلمُوَحِّدِيّن وَانْصُرْ مَنْ نَصَرَ الدِّيْنَ وَاخْذُلْ مَنْ خَذَلَ اْلمُسْلِمِيْنَ وَ دَمِّرْ أَعْدَاءَ الدِّيْنِ وَأَعْلِ كَلِمَاتِكَ إِلَى يَوْمَ الدِّيْنِ. اللهُمَّ ادْفَعْ عَنَّا اْلبَلاَءَ وَاْلوَبَاءَ وَالزَّلاَزِلَ وَاْلمِحَنَ وَسُوْءَ اْلفِتَن وَاْلمِحَنَ مَا ظَهَرَ مِنْهَا وَمَا بَطَنَ عَنْ بَلَدِنَا اِنْدُونِيْسِيَّا خآصَّةً وَسَائِرِ اْلبُلْدَانِ اْلمُسْلِمِيْنَ عآمَّةً يَا رَبَّ اْلعَالَمِيْنَ. رَبَّنَا آتِناَ فِى الدُّنْيَا حَسَنَةً وَفِى اْلآخِرَةِ حَسَنَةً وَقِنَا عَذَابَ النَّارِ. رَبَّنَا ظَلَمْنَا اَنْفُسَنَا وَإنْ لَمْ تَغْفِرْ لَنَا وَتَرْحَمْنَا لَنَكُوْنَنَّ مِنَ اْلخَاسِرِيْنَ.

 عِبَادَاللهِ ! إِنَّ اللهَ يَأْمُرُ بِاْلعَدْلِ وَاْلإِحْسَانِ وَإِيْتآءِ ذِي اْلقُرْبىَ وَيَنْهَى عَنِ اْلفَحْشآءِ وَاْلمُنْكَرِ وَاْلبَغْي يَعِظُكُمْ لَعَلَّكُمْ تَذَكَّرُوْنَ وَاذْكُرُوا اللهَ اْلعَظِيْمَ يَذْكُرْكُمْ وَاشْكُرُوْهُ عَلىَ نِعَمِهِ يَزِدْكُمْ وَلَذِكْرُ اللهِ أَكْبَرُ

Abdul Kamil, Pegiat kajian tafsir dan hadits, tinggal di jakarta