Khutbah Jumat Bahasa Minang: Caro Mansyukuri Nikmaik Kemerdekaan 

Teks khutbah Jumat ini mengajak kepada para jamaah untuk mengimplemetasikan rasa syukur atas nikmat kemerdekaan dengan berbagai cara. Adapun judul khutbah ini adalah “Khutbah Jumat Bahasa Minang: Caro Mansyukuri Nikmaik Kemerdekaan”.

Untuk mencetak naskah khutbah Jumat ini, silakan klik ikon print berwarna merah di atas atau bawah artikel ini (pada tampilan desktop). Semoga bermanfaat.

---

Khutbah I 

اَلْحَمْدُ لِلّٰهِ ذِي الْجَلَالِ وَالْإِكْرَامِ، الَّذِيْ أَعَزَّنَا بِالْإِسْلَامِ، وَأَكْرَمَنَا بِالْإِيْمَانِ، وَنَوَّرَ قُلُوْبَنَا بِالْقُرْاٰنِ، أَشْهَدُ أَنْ لَا اِلَهَ إِلَّا الله وَحْدَهُ لا شَرِيك لَه، ذُو اْلجَلالِ وَالإكْرام، وَأَشْهَدُ أَنّ سَيِّدَنَا وَنَبِيَّنَا مُحَمَّدًا عَبْدُهُ وَ رَسولُه. اللّٰهُمَّ صَلِّ وَسَلِّمْ عَلَى سَيِّدِنَا مُحَمَّدٍ، وَعَلَى أٰلِهِ وَصَحْبِهِ وَمَنْ وَالاَهُ

أَمَّابَعْدُ؛ فَيَآ أَيُّهَا النَّاسُ، اتَّقُوا اللهَ حَقَّ تَقْوَاهُ كَمَا قَالَ تَعَالَى: يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ.

قَالَ اللهُ تَعَالَى فِي كِتَابِهِ الْكَرِيْمِ، أَعُوْذُ بِاللهِ مِنَ الشَّيْطَانِ الرَّجِيْمِ، بِسْمِ اللهِ الرَّحْمَنِ الرَّحِيْمِ، يٰٓاَيُّهَا الَّذِيْنَ اٰمَنُوْا تُوْبُوْٓا اِلَى اللّٰهِ تَوْبَةً نَّصُوْحًاۗ. صَدَقَ اللهُ الْعَظِيْمِ

Kaum muslimin wal muslimat sidang jamaah Jumaik nan dimuliakan dek Allah SWT

Awal kalam bamulo kato, tiado kato nan patuik taucap di lisan kito, tiado syair nan labiah indah untuak kito dendangkan, malainkan mamuji dan mamuja Allah SWT. Kareno barakaik rahmat jo karunia Baliau, kito bisa malakukan aktivitas sahari-sahari. Ado nan ka parak, ado nan manggaleh dan ado pulo nan karajo di kantua. 

Namun Allah agiah nikmaik lain kapado kito basamo, yaitu nikmaik kaimanan, sahinggo tagarak hati kito untuak mamanuahi panggilan Alllah untuak manunaikan ibadah Jumaik sacaro bajamaah. Tantangan  pado itu kaum muslimin, marilah kito basamo-samo basyukur mangucapkan alhamdulillahirabbil’alamiin, sagalo puji hanyo untuak Allah SWT.

Kamudian dari pado itu kaum muslimin, shalawaik barangkaikan salam, marilah sanantiaso kito basalawaik kapado junjungan alam, yaitu Nabi Muhammad SAW. Allaahumma shalli ‘alaa sayyidina Muhammad wa ‘ala aali sayyidinaa Muhammad. Kito samo-samo baharap dangan salawaik nan salalu mambasahi lidah jo bibia kito, mudah-mudahan kito dinobaikkan sabagai umaik nan barhak mandapek syafaat baliau di yaumil qiyamah nanti.

Khatib indak akan bosan-bosan mangajak kaum muslimin dan kaum muslimat, tarutamo kapado diri khatib pribadi, untuak sanantiaso maningkekkan katakwaan kito kapado Allah SWT. Yaitu dengan caro mangarajokan sagalo parintah dari Allah SWT dan maninggalkan sagalo bantuak larangan Baliau.

Kaum muslimin wal muslimat sidang jamaah Jumaik nan dimuliakan dek Allah SWT

Kini ko kito barado di bulan Agustus. Yaitu bulan nan sangaik istimewa dalam sajarah panjang nagari kito Indonesia. Bulan nan manjadi puncak parjuangan para pahlawan kito dalam mandirikan negara nan tacinto, Negara Kesatuan Republik Indonesia. Kareno, pado bulan Agustus babarapo puluahan tahun silam, para pandiri bangsa kito alah barhasil basatu padu dalam mahantikan panjajahan dan mamproklamirkan kemerdekaan Indonesia ka saluruah panjuru dunia.

Indonesia marupokan bangsa nan gadang, mamiliki babagai kakayaan baiak itu dari sektor bumi nan malahiakan bahan pangan dan kabutuahan industri, maupun kakayooan dalam sektor budaya, bahaso dan adaik istiadaik. 

Namun parbedaan itu indak mambuek kito pacah, justru inyo manjadi panyumangaik dan pandorong kito untuak sanantiaso basatu. Sahinggo pado tanggal 17 Agustus 1945, Bapak Proklamator kito Soekarna dan Hatta barhasil mamproklamirkan kemerdekaan kito di mato dunia.

Sabagai masyarakaik nan kini manikmati parjuangan para tatuo kito di maso lalu, mako kito haruslah mansyukuri kemerdekaan itu jo caro-caro nan bisa mampatahankan kautuahan nagari kito Indonesia ko. Barikuik adolah babarapo hal nan harus kito lakukan dalam mansyukuri nikmaik kemerdekaan:

Pertama, Mancintoi tanah air. Cinto tanah air marupokan langkah awal dalam mawujudkan raso syukur ateh nikmaik kemerdekaan. Urang nan mancintoi tanah air akan sanantiaso manjago kampuang ataupun nagarinyo dalam sagalo bantuak papacahan. Islam sabagai agamo mayoritas di Indonesia mandorong kito untuak mancintoi tanah kalahiran. Hal iko sabagaimano tagambar dari doa Nabi Ibrahim a.s. barikuik:

وَإِذْ قَالَ إِبْرَاهِيمُ رَبِّ اجْعَلْ هَـٰذَا بَلَدًا آمِنًا وَارْزُقْ أَهْلَهُ مِنَ الثَّمَرَاتِ مَنْ آمَنَ مِنْهُم بِاللَّـهِ وَالْيَوْمِ الْآخِرِ قَالَ وَمَن كَفَرَ فَأُمَتِّعُهُ قَلِيلًا ثُمَّ أَضْطَرُّهُ إِلَىٰ عَذَابِ النَّارِ وَبِئْسَ الْمَصِيرُ

Artinyo: “Dan katiko badoa Nabi Ibrahim, wahai Tuhan, jadikanlah nagari ko sabagai nagari nan aman, dan limpahkanlah ransaki barupo buah-buahan kapado panduduaknyo nan baiman diantaro mereka kapado Allah dan hari kiamaik.” [al-Baqarah: 126].

Dari doa Nabi Ibrahim a.s. iko, kito bisa mancaliak wujuik cinto nan tuluih dari Nabi Ibrahim untuak kampuangnyo. Di dalam doanyo Nabi Ibrahim mamintak kapado Allah Swt agar kampuangnyo dibarikan raso aman sarato ransaki untuak panduduaknyo nan baiman. 

Tantu disiko dapek kito pahami bahwasonyo iko marupokan bantuak raso cinto Nabi Ibrahim ka kampuang halamannyo. Doa nan baiak adolah ekspresi cinto nan paliang sarius ditunjuakkan dek seseorang kapado urang atau apo nan nyo cintoi.

Kaum muslimin sidang jamaah jumaik nan dimuliakan dek Allah Swt.

Mancintoi tanah air marupokan pakaro nan mulia di dalam Islam. Ado sabuah pameo di kalangan masyarakaik muslim di Indonesia nan sabagian urang maanggap itu adolah hadis.

حب الوطن من الإيمان

Artinyo: “Cinto tanah air itu adolah bagian dari kaimanan.” 

Namun para ulama manilai iko bukan lah hadis. Walaupun damikian, namun makna hadis iko batua di dalam pandangan Islam. Hal iko sabagaimano dijalehkan dek Imam as-Sakhawi sabagai barikuik:

لَمْ أَقِفْ عَلَيْهِ وَمَعْنَاهُ صَحِيْحٌ فِي ثَالِثِ الْمُجَالَسَةِ لِلدَّيْنَوَرِيِّ مِنْ طَرِيْقِ الْأَصْمَعِيِّ سَمِعْتُ اَعْرَابِيًّا يَقُوْلُ إِذَا أَرَدْتَ أَنْ تَعْرِفَ الرَّجُلَ فَانْظُرْ كَيْفَ تَحَنُّنُهُ إِلَى أَوْطَانِهِ وَتَشَوُّقُهُ إِلَى إِخْوَانِهِ وَبُكَاؤُهُ عَلَى مَا مَضَى مِنْ زَمَانِهِ 

Artinyo: ”Ambo indak manamui riwayat ko sabagai hadis, namun maknanyo itu sahih . Di dalambagian katigo kitab al-Mujalasah wa Jawahirul ‘Ilmi karya Abu Bakar Muhammad bin Marwan ad-Dinawari (w 333 H, dari jalur al-Asma’i ado sabuah riwayat: ‘ ambo mandanga seorang badui bakato; apobilo kalian ingin mangenali seseorng, mako parhatikan baa karinduannyo pado tanah airnyo, karinduannyo kapado kawan-kawannyodan tangisannyo ateh apo nan alah balalu di zamannyo.” (Abdurrahman as-Sakhawi, al-Maqasid al-Hasanah minal Ahadits al-Masyhurah ‘alal Alsinah, [Dar al-Kitab al-‘Arabi], halaman 297).

Kaum muslimin sidang jamaah jumaik nan dimuliakan dek Allah Swt.

Kedua, ikuik talibaik dalam manjago persatuan umaik. Sebagai generasi panaruih, kito sabagai bangsa Indonesia harus ikuik sato talibaik di dalam manjago kautuahan NKRI. Karno, kito indak akan bisa merdeka dari panjajahan kalau indak jo raso pasatuan nan kuaik di antaro pahlawan kito di maso lalu. Mako dek karno itu, para pahlawan kito dan tatuo kito di maso lalu alah basusah payah manjago persatuan sarato manyiapkan generasi panaruih nan tangguah untuak manjawek tantangan zaman. Dalam hal iko Allah Swt bafirman:

وَلْيَخْشَ الَّذِيْنَ لَوْ تَرَكُوْا مِنْ خَلْفِهِمْ ذُرِّيَّةً ضِعٰفًا خَافُوْا عَلَيْهِمْۖ فَلْيَتَّقُوا اللّٰهَ وَلْيَقُوْلُوْا قَوْلًا سَدِيْدًا 

Artinyo: "Handaklah maraso takuik urang-urang nan saandainyo (mati) maninggakan sasudah mereka katurunan nan lamah nan mereka cameh terhadapnyo. Mako batakwalah kapado Allah dan bakatolah jo tutur kato nan batua.” [QS. An-Nisa: 9]

Di lain hal, Islam sendiri sangaik manyukoi adonyo persatuan dan kasatuan. Walaupun awak di Indonesia tadiri dari banyak karagaman bahaso dan budayo, namun hal itu indak manjadi pahambek bagi kito untuak sanantiaso saliang manjago persatuan. Kareno karagaman nan ado di antaro kito pado dasarnyo adolah rahmat nan kito disuruah untuak saliang mengenali dan mamahami satu samo lain. Allah Swt bafirman sabagai barikuik:

يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ 

Artinyo, “Wahai manusia, sasungguahnyo Kami manciptakan kalian babangso-bangso dan basuku-suku supayo kalian saliang mangenal, sausungguahnyo nan paliang mulia disisi Allah adolah urang nan paliang batakwa di antaro kalian. Sasungguahnyo Allah maha tahu lagi maha mangenal.” [QS. Al-Hujurat: 13]

Syekh Ibnu ‘Asyur di dalam tafsirnyo manjalehkan bahwasonyo hikmah manusia diciptkan di dalam kaadaan babangso-bangso dan basuku adolah agar awak namuah saliang mangenal antar satu jo nan lainnyo. Dan iko lah sabananyo nan dimukasuik Allah Swt di dalam ayaik ko. [Ibnu ‘Asyur, at-Tahrir wa at-Tanwir, (Tunis: ad-Dar at-Tunisiyyah li an-Nasyr:1984 H), jilid. 26. Halaman 261].

Jadi, saharusnyo parbedaan nan ado diantaro awak digunokan sabagai saranan untuak saliang mangenali, bukan untuak saliang manjatuahkan ataupun mambuek parmusuahan. Karno kamuliaan indak bisa dinilai dari suduik pandang budayo dan bangso dari mano kito barasal.

Rasulullah Saw sajo di dalam khutbah terakhirnyo alah maingekkan kito basamo bahwa indak ado kamuliaan ateh bangso arab dibandiang bangso salain arab. Kasadonyo samo di mato Allah Swt. Hal iko sabagaimano dijalehkan Syekh Ibnu ‘Asyur di dalam kitab tafsirnyo sabagai barikuik:

خَطَبَ بِهِ رَسُول الله صَلَّى اللهُ عَلَيْهِ وَسَلَّمَ فِي حَجَّةِ الْوَدَاعِ إِذْ قَالَ: «يَا أَيُّهَا النَّاسُ أَلَا إِنَّ رَبَّكُمْ وَاحِدٌ وَأَنَّ أَبَاكُمْ وَاحِدٌ لَا فَضْلَ لِعَرَبِيٍّ عَلَى عَجَمِيٍّ وَلَا لِعَجَمِيٍّ عَلَى عَرَبِيٍّ وَلَا لِأَسْوَدَ عَلَى أَحْمَرَ وَلَا لِأَحْمَرَ عَلَى أَسْوَدَ إِلَّا بِالتَّقْوَى

Artinyo: “Rasulullah Saw manyampaikan katubah di haji wada’, wakatu itu liau bakato; wahai manusia, katahuilah sasungguahnyo tuhan kalian itu ciek, dan bapak kalian pun samo,indak ado kautamaan bagi urang arab ateh urang ajam nan indak asli arab, dan baitu pulo sabaliaknyo, indak ado pulo kautamaan urang bakulik itam ateh urang bakulik merah, dan baitu pulo sabaliaknyo, malainkan nan utamo tu adolah urang nan batakwa.” [Ibnu ‘Asyur, at-Tahrir wa at-Tanwir, (Tunis: ad-Dar at-Tunisiyyah li an-Nasyr:1984 H), jilid. 26. Halaman 261].

Ketiga, manumbuahkan sikap dermawan kapado sasamo. Hal lain nan paralu kito tumbuahkan dalam mangisi sumangaik kemerdekaan adolah manerapkan sikap tolong manolong antar sasamo. Kito harus manyadari bahwasonyo salah satu sabab tacapainyo kemerdekaan bangsa Indonesia itu adolah karno adonyo kasadaran raso paduli untuak mambantuak urang lain nan sadang mambutuahkan.

Di dalam Islam, sipaik tolong-manolong sangaik mandapek parhatian. Allah Swt acok kali maingekkan kito tantang pantiangnyo tolong manolong di dalam manjalani kahidupan. Allah Swt bafirman sabagai barikuik:

وَتَعَاوَنُوا عَلَى الْبِرِّ وَالتَّقْوَى وَلا تَعَاوَنُوا عَلَى الإثْمِ وَالْعُدْوَانِ

Artinyo: “Dan tolong-manolonglah kalian dalam kabaikan dan katakwaan, dan jan kalian tolong manolong di dalam doso dan pamusuahan.” (QS. Al-Maidah: 2)

Ayaik ko manjalehkan kapado kito basamo agar kito sanantiaso tolong-manolong di dalam kabaikan dan katakwaan. Dan kito paralu ingek bahwasonyo kabaikan nan di makasuik di dalam ayaik ko mamiliki kandungan nan sangaik banyak. Mako dek karno itu, sanantiaso lah kito murah babagi kapado yang lain nan sadang mambutuahkan.

Sipaik tolong manolong akan mambantu kito dan bangsa kito untuak mandapek raso sejahtera nan marato. Jan sampai kito tega mambiakan masyarakaik di sakitar kito iduik sansaro samantaro kito hiduik dalam kaadaan kayo rayo.

Di sampiang itu, Rasulullah Saw alah manjalehkan di dalam hadisnyo urang nan lai namuah manolong urang lain, mako Allah Swt akan barikan pulo patolongan kapadonyo. Rasullullah Saw basabda:

وَاللهُ في عَوْنِ العَبْدِ مَا كَانَ العَبْدُ فِي عَوْنِ أَخِيْهِ

Artinyo, “Dan Allah akan sanantiaso manolong hamba-Nyp katiko hamba-Nyo tu lai namuah manolong dunsanaknyo.” (HR. Muslim)

Kaum muslimin sidang jamaah Jumaik nan dimuliakan dek Allah Swt.

Di akhia katubah ko, khatib sakali lai ingin maingekkan kito basamo bahwasonyo mansyukuri nikmaik kemerdekaan bagi kito basamo adolah hal pantiang. Karno tanpa adonyo nikmaik kemerdekaan tu, mako kito akan susah untuak baibadah dan manjalani iduik di bumi Indonesia nan tacinto iko. Dek karno itu marilah kito isi nikmaik kemerdekaan dengan caro sanantiaso mancintoi tanah air, manjago persatuan dan manerapkan sikap tolong-maonolong antar sasamo.

Damikianlah khutbah kito pado saat kini, mudah-mudahan iko bisa manjadi bahan ranuangan dek kito basamo. Mudah-mudahan nagari kito tatap dijago kautuahannyo dek Allah Swt. Aamiin.

بَارَكَ اللهُ لِي وَلَكُمْ فِي الْقُرْآنِ الْعَظِيْمِ وَنَفَعَنِي وَاِيِّاكُمْ بما فيه مِنَ الآيَاتِ وَالذِّكْرِ الْحَكِيْمِ. وَتَقَبَّلْ مِنِّيْ وَمِنْكُمْ تِلاوَتَهُ اِنّهُ هُوَ السَّمِيْعُ اْلعَلِيْمُ.. فَاسْتَغْفِرُوْا اِنَّهُ هُوَ اْلغَفُوْرُ الرَّحِيْمُ

Khutbah II 

اَلْحَمْدُ للهِ عَلىَ إِحْسَانِهِ وَالشُّكْرُ لَهُ عَلىَ تَوْفِيْقِهِ وَاِمْتِنَانِهِ. وَأَشْهَدُ أَنْ لاَ اِلَهَ إِلاَّ اللهُ وَاللهُ وَحْدَهُ لاَ شَرِيْكَ لَهُ وَأَشْهَدُ أنَّ سَيِّدَنَا مُحَمَّدًا عَبْدُهُ وَرَسُوْلُهُ الدَّاعِى إلىَ رِضْوَانِهِ. اللهُمَّ صَلِّ عَلَى سَيِّدِنَا مُحَمَّدٍ وِعَلَى اَلِهِ وَأَصْحَابِهِ وَسَلِّمْ تَسْلِيْمًا كِثيْرًا أَمَّا بَعْدُ. فَياَ اَيُّهَا النَّاسُ اِتَّقُوااللهَ فِيْمَا أَمَرَ وَانْتَهُوْا عَمَّا نَهَى وَاعْلَمُوْا أَنَّ اللهَ أَمَرَكُمْ بِأَمْرٍ بَدَأَ فِيْهِ بِنَفْسِهِ وَثَـنَى بِمَلآ ئِكَتِهِ بِقُدْسِهِ وَقَالَ تَعاَلَى إِنَّ اللهَ وَمَلآئِكَتَهُ يُصَلُّوْنَ عَلىَ النَّبِى يآ اَيُّهَا الَّذِيْنَ آمَنُوْا صَلُّوْا عَلَيْهِ وَسَلِّمُوْا تَسْلِيْمًا.

 اللهُمَّ صَلِّ عَلَى سَيِّدِنَا مُحَمَّدٍ صَلَّى اللهُ عَلَيْهِ وَسَلِّمْ وَعَلَى آلِ سَيِّدِناَ مُحَمَّدٍ وَعَلَى اَنْبِيآئِكَ وَرُسُلِكَ وَمَلآئِكَةِ اْلمُقَرَّبِيْنَ وَارْضَ اللّهُمَّ عَنِ اْلخُلَفَاءِ الرَّاشِدِيْنَ أَبِى بَكْرٍ وَعُمَر وَعُثْمَان وَعَلِى وَعَنْ بَقِيَّةِ الصَّحَابَةِ وَالتَّابِعِيْنَ وَتَابِعِي التَّابِعِيْنَ لَهُمْ بِاِحْسَانٍ اِلَى يَوْمِ الدِّيْنِ وَارْضَ عَنَّا مَعَهُمْ بِرَحْمَتِكَ يَا أَرْحَمَ الرَّاحِمِيْنَ .

 اَللهُمَّ اغْفِرْ لِلْمُؤْمِنِيْنَ وَاْلمُؤْمِنَاتِ وَاْلمُسْلِمِيْنَ وَاْلمُسْلِمَاتِ اَلاَحْيآءِ مِنْهُمْ وَاْلاَمْوَاتِ اللهُمَّ أَعِزَّ اْلإِسْلاَمَ وَاْلمُسْلِمِيْنَ وَأَذِلَّ الشِّرْكَ وَاْلمُشْرِكِيْنَ وَانْصُرْ عِبَادَكَ اْلمُوَحِّدِيّن وَانْصُرْ مَنْ نَصَرَ الدِّيْنَ وَاخْذُلْ مَنْ خَذَلَ اْلمُسْلِمِيْنَ وَ دَمِّرْ أَعْدَاءَ الدِّيْنِ وَأَعْلِ كَلِمَاتِكَ إِلَى يَوْمَ الدِّيْنِ. اللهُمَّ ادْفَعْ عَنَّا اْلبَلاَءَ وَاْلوَبَاءَ وَالزَّلاَزِلَ وَاْلمِحَنَ وَسُوْءَ اْلفِتَن وَاْلمِحَنَ مَا ظَهَرَ مِنْهَا وَمَا بَطَنَ عَنْ بَلَدِنَا اِنْدُونِيْسِيَّا خآصَّةً وَسَائِرِ اْلبُلْدَانِ اْلمُسْلِمِيْنَ عآمَّةً يَا رَبَّ اْلعَالَمِيْنَ.

 رَبَّنَا آتِناَ فِى الدُّنْيَا حَسَنَةً وَفِى اْلآخِرَةِ حَسَنَةً وَقِنَا عَذَابَ النَّارِ. رَبَّنَا ظَلَمْنَا اَنْفُسَنَا وَإنْ لَمْ تَغْفِرْ لَنَا وَتَرْحَمْنَا لَنَكُوْنَنَّ مِنَ اْلخَاسِرِيْنَ.

 عِبَادَاللهِ ! إِنَّ اللهَ يَأْمُرُ بِاْلعَدْلِ وَاْلإِحْسَانِ وَإِيْتآءِ ذِي اْلقُرْبىَ وَيَنْهَى عَنِ اْلفَحْشآءِ وَاْلمُنْكَرِ وَاْلبَغْي يَعِظُكُمْ لَعَلَّكُمْ تَذَكَّرُوْنَ وَاذْكُرُوا اللهَ اْلعَظِيْمَ يَذْكُرْكُمْ وَاشْكُرُوْهُ عَلىَ نِعَمِهِ يَزِدْكُمْ وَلَذِكْرُ اللهِ أَكْبَرُ

Abdul Kamil, Pegiat kajian tafsir dan hadits, tinggal di Jakarta