Khutbah Jumat Bahasa Sunda: Nyandak Hikmah tina Musibah 

Beberapa waktu terakhir ini, sejumlah daerah di Tanah Air dilanda musibah dan bencana alam, kondisi ini tentu cukup memprihatinkan. Namun, di mata orang yang beriman, dalam setiap peristiwa pasti ada hikmah dan pelajaran yang dapat dipetik, termasuk dalam bencana alam dan musibah. 

 

Teks khutbah Jumat berikut ini berjudul "Khutbah Jumat Bahasa Sunda: Nyandak Hikmah Tina Musibah". Untuk mencetak naskah khutbah Jumat ini, silakan klik ikon print berwarna merah di atas atau bawah artikel ini (pada tampilan desktop). Semoga bermanfaat! (Redaksi)

Khutbah I

 

اَلْحَمْدُ ِللهِ الْمَلِكِ الدَّيَّانِ، وَالصَّلَاةُ وَالسَّلَامُ عَلَى مُحَمَّدٍ سَيِّدِ وَلَدِ عَدْنَانَ، وَعَلَى آلِهِ وَصَحْبِهِ وَتَابِعِيْهِ عَلَى مَرِّ الزَّمَان، وَأَشْهَدُ أَنْ لَّا إِلهَ إِلَّا اللهُ وَحْدَهُ لَا شَرِيْكَ لَهُ الْمُنَـزَّهُ عَنِ الْجِسْمِيَّةِ وَالْجِهَةِ وَالزَّمَانِ وَالْمَكَانِ، وَأَشْهَدُ أَنَّ سَيِّدَنَا مُحَمَّدًا عَبْدُهُ وَرَسُوْلُهُ الَّذِيْ كَانَ خُلُقُهُ الْقُرْآنَ، اَللَّهُمَّ صَلِّ وَسَلِّمْ عَلَى سَيِّدِنَا مُحَمَّدٍ وَعَلى آلِهِ وِأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدّيْن،

 

أَمَّا بَعْدُ، فَيَاعِبَادَ الرَّحْمٰنِ، فَإنِّي أُوْصِيْكُمْ وَنَفْسِي بِتَقْوَى اللهِ المَنَّانِ، الْقَائِلِ فِي كِتَابِهِ الْقُرْآنِ: أَعُوْذُ بِاللهِ مِنَ الشَّيْطَانِ الرَّجِيْمِ، بِسْمِ اللهِ الرَّحْمٰنِ الرَّحِيْمِ، يَاأَيّهَا الّذَيْنَ آمَنُوْا اتَّقُوا اللهَ حَقَّ تُقَاتِهِ وَلاَ تَمُوْتُنّ إِلَّا وَأَنْتُمْ مُسْلِمُوْنَ، وَقَالَ وَبَشِّرِ الصَّابِرِيْنَ الَّذِيْنَ إِذَا أَصَابَتْهُمْ مُّصِيْبَةٌ قَالُواْ إِنَّا لِلّٰهِ وَإِنَّا إِلَيْهِ رَاجِعُوْنَ، صَدَقَ اللهً العَظِيْمَ

 

Hadirin rohimakumulloh 

Puji sareng syukur urang panjatkeun ka Alloh Robbun Gofur. Solawat miwah salam mugia salamina dilimpahkeun ka Kangjeng Nabi Muhammad saw. Mugia wae hadirna urang sadayana dina ieu waktos sing janten wasilah diangkenna urang salaku umatna jaga dina poe Kiamah kalayan ngengingkeun syafaatna. Amin ya robbal alamin.

 

Langkung ti payun, khotib seja ngadugikeun wasiat, khusus ka diri pribadi, umum ka jamaah Jumah sadayana. Hayu urang sami-sami mertahankeun oge ningkatkeun kaimanan sareng katakwaan ka Alloh swt. Takwa anu ngandung hartos tumut kana sagala rupi parentah Alloh oge nebihan tina sagala rupi panyegah Mantenna.    

 

Hadirin rohimakumulloh 

Dina sababaraha minggon terakhir, sabagian dulur urang nuju ditibanan musibah. Salah sawiosna musibah banjir anu tumiba ka wargi urang nu aya di Sumatra Barat. Nyakitu deui musibah longsor di Toraja, gempa di Garut, kahalodoan, gagal panen, wabah panyakit, sareng musibah sanesna. 

 

Mun seug ku urang dititenan, alam sapertos anu tos murka kana kasarakahan manusa anu terus-terusan ngaeksploitasi hasilna. Terlepas tina sagala tingkah jeung kasalahan manusa, Al-Qur’an parantos nganyatakeun, yen sadayana musibah parantos digariskeun ku Alloh swt. Sakumaha dawuhan-Nana dina serat at-Taobat ayat 51:

 

قُلْ لَنْ يُصِيْبَنَا إلاَّ مَا كَتَبَ اللهُ لَنَا هُوَ مَوْلاَنَا وَعَلَى اللهِ فَلْيَتَوَكَّلِ اْلمُؤْمِنُوْنَ 

 

Hartosna, “Dugikeun (Muhammad): Sama sakali moal nimpa kaula salian ti perkara anu tos ditetepkeun ku Alloh ka kaula. Anjeunna nu nangtayungan kaula, jeung ukur ka Allah jalma-jalma anu iman kudu tawakal.” 

 

Dina ayat neme, Alloh ngajelaskeun yen satiap kajadian tos digariskeun ku Alloh. Sahingga ukur ka Alloh, urang nyuhunkeun perlindungan. 

 

Pertarosannana naha Alloh nimpakeun bencana ka hamba-Na? Kalebet ka hamba-Na anu ariman? Kunaon teu nimpakeun musibah ka jalma kafir atanapi jalma anu teu iman? Jawabannana sabab di balik musibah anu terjadi aya hikmah sareng pelajaran anu kalintang ageungna. 

 

Ku hal sakitu, dulur-dulur urang anu katimpa musibah tur masih salamet mugi sing dipaparin kasobaran oge sing tiasa metik pelajaran tina eta musibah. Nyakitu deui urang anu teu keuna ku musibah kedah bersyukur sareng sing tiasa metik pelajaran tina musibah nu tumiba ka dulur-dulur urang. 

 

Urang sing ngarasa untung masih dipasihan kasempatan keur ngomean diri sareng amal ibadah kanu Kawasa. Atuh dulur-dulur urang anu ngantunkeun ku akibat musibah, urang doakeun mugia aranjeunna sing husnul khotimah, kalebet maot anu syahid, tur aya dina ridona Alloh swt. Amin ya robbal alamin. 

 

Hadirin rohimakumulloh 

Urang terkadang mandang musibah teh hiji perkara anu goreng, pikasediheun, jeung nyangsarakeun. Padahal mah seueur hikmah jeung kahadean di satukangeun eta musibah. 

 

Di antawisna, kahiji musibah teh jadi ujian kaimanan jeung kasabaran hiji hamba. Jadi urang ulah waka ngaku jadi jalma anu iman samemeh dipaparin ujian. Hal itu saluyu jeung katerangan ayat: 

 

أَحَسِبَ النَّاسُ أَنْ يُتْرَكُوا أَنْ يَقُولُوا آمَنَّا وَهُمْ لَا يُفْتَنُونَ، وَلَقَدْ فَتَنَّا الَّذِينَ مِنْ قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ

 

Hartosna, “Naha manusa ngira yen maranehna diantep ngucapkeun ‘Kaula geus iman’, sedengkeun maranehna teu diuji.” (QS. Al-‘Ankabut [29]: 2-3).   

 

Ayat ieu ngisyaratkeun yen ujian mangrupakeun kaniscayaan keur jalma-jalma anu ariman. Sahingga, teu heran keur jalma anu geus apal kana hakekat musibah, musibah teh bakal jadi perkara anu berharga keur nganelan kasabaran, kayakinan, jeung kaimanan ka Alloh swt.   

 

Kadua, musibah teh wujud kanyaah sareng kadeudeuh Alloh. Teu seueur nu uninga yen musibah teh cara Alloh keur mikanyaah hamba-Na. Hal ieu saluyu jeung salah sawios pidawuh Kangjeng Rosul:   

 

مَنْ يُرِدِ اللّٰهُ بِهِ خَيْرًا يُصِبْ مِنْهُ

 

Hartosna, “Sing saha jalma anu diirodah kenging kahadean, maka anjeuna sok ditimpa ku musibah,” (HR. al-Bukhari). 

 

Hadirin rohimakumulloh 

Katilu, ngalangkungan musibah, Allah hoyong ngahampura sareng ngahapus dosa-dosa hamba-Na. Hal ieu sakumaha anu ditetelekan ku Kangjeng Rosul anu diriwayatkan ku Imam Abu Dawud:  

 

مَا مِنْ مُسْلِمٍ يُصِيبُهُ أَذًى مِنْ مَرَضٍ، فَمَا سِوَاهُ إِلَّا حَطَّ اللهُ بِهِ سَيِّئَاتِهِ، كَمَا تَحُطُّ الشَّجَرَةُ وَرَقَهَا

 

Hartosna, “Teu pati-pati hiji jalma muslim ditimpa musibah penyakit atawa musibah sanesna kecuali ku musibah eta Alloh ngahapus kasalahan-kasalahanana.” 

 

Hadirin rohimakumulloh

Nanging, sagigireun ti hikmah nu eta, urang kedah emut yen musibah tiasa wae janten teguran, khususnya keur jalma-jalma anu lalawora kana parentah Alloh. Salian ti urang kedah yakin yen satiap musibah anu tumiba di bumi atanapi kana diri hakekatna papasten Alloh. 

 

Nyakitu deui urang kedah yakin yen Alloh Maha Kawasa nibankeun perkara naon wae sesuai sareng irodah-Na. Salah sawios hikmah eta musibah teh nyaeta supaya jalma teu kajongjoinan di alam dunya jeung nyombongkeun diri salaku manusa makhluk anu kedah ngabakti ka pangerannana.  

 

Hal ieu loyog sareng dawuhan Alloh dina surah Al-Hadid ayat 22-23

 

مَا أَصَابَ مِنْ مُصِيبَةٍ فِي الْأَرْضِ وَلَا فِي أَنْفُسِكُمْ إِلَّا فِي كِتَابٍ مِنْ قَبْلِ أَنْ نَبْرَأَهَا إِنَّ ذَلِكَ عَلَى اللَّهِ يَسِيرٌ ، لِكَيْلَا تَأْسَوْا عَلَى مَا فَاتَكُمْ وَلَا تَفْرَحُوا بِمَا آَتَاكُمْ وَاللَّهُ لَا يُحِبُّ كُلَّ مُخْتَالٍ فَخُورٍ

 

Hartosna, “Teu aya hiji bencana anu nimpa di muka bumi jeung nu nimpa kana diri aranjeun, kecuali geus ditulis dina kitab (lauh Mahfuzh) samemeh Kaula nyiptakeunnana. Saenya-enyana, anu kitu teh gampang kanggo Alloh. Kaula ngajelaskeun kitu) supaya aranjeun ulah putus asa kana perkara anu geus kaliwat ti aranjeun, jeung supaya aranjeun ulah bungah teuing tina perkara anu geus dibikeun ka aranjeun. Jeung ari Alloh teu mikaresep ka jalma-jalma anu nyombongkeun jeung ngabanggakeun diri,” (QS. Al-Hadid [56]: 22-23). 

 

Hadirin rohimakumulloh 

Bencana alam sareng musibah tos mineng tumiba ka nagara urang. Tapi urang kadang can sadar kana eta peringatan. Urang can keneh ngomean diri, sikap, sareng kalakuan. Langkung parah deui, sanajan musibah datang silih berganti, urang masih keneh talobeh ngajaga alam. Malahan, masih resep ngaruksak. Sahingga, jelas tur tetela dina Al-Quran, terjadina rupa-rupa karuksakan teh akibat ulah jeung perbuatan leungeun urang. 

 

Mangga urang titenan dawuhan Alloh dina surat Ar-Rum ayat 41.

 

 ظَهَرَ الفَسَادُ فِيْ الُبَرِّ وَاْلبَحْرِ بِمَا كَسَبَتْ أيْدِي النَّاسِ لِيُذِيْقَهُمْ بَعْضَ اَّلذِيْ عَمِلُوْا لَعَلَّهُمْ يَرْجِعُوْنَ 

 

Hartosna, “Tos zohir karusakan di daratan jeung di lautan disebabkeun ku perbuatan leungeun manusa, supaya Alloh ngarasakeun keur maranehna sabagian tina (akibat) perbuatan maranehna, supaya maranehna balik (ka jalan anu bener)." 

 

Walhasil, saruntuyan musibah anu nimpa urang atanapi dulur-dulur urang kedah janten tadzkirah atanapi pepeling keur leuwih ngadeukeutkeun diri ka Alloh Robbul Izzati oge ningkatkeun amal bakti urang ka Mantenna. Salian ti eta, musibah oge nunjukkeun kana kakawasaan Alloh swt. 

 

Sahingga geus sakuduna keur urang mantengkeun doa, ngadeukeutkeun diri, jeung menta panghampura ka Alloh. Sabab, bisa jadi karuksakan jeung musibah nu terjadi akibat kasalahan urang sorangan. 

 

Mugia wae nagara, khususna kampung-kampung urang sing diraksa oge dijaga ku Alloh swt tina sagala rupi balai, bencana, sinareng musibah, terutama musibah anu matak ngaruntagkeun kaimanan ka Mantenna.

 

بَارَكَ اللهُ لِي وَلَكُمْ فِي الْقُرْآنِ الْعَظِيْمِ. وَنَفَعَنِي وَاِيِّاكُمْ بِمَا فِيْهِ مِنَ الآيَاتِ وَالذِّكْرِ الْحَكِيْمِ. وَتَقَبِّلَ الله مِنِّي وَمِنْكُمْ تِلاوَتَهُ اِنَّهُ هُوَاالسَّمِيْعُ الْعَلِيْمُ. أقُوْلُ قَوْلِي هَذا وَأسْتَغْفِرُوا اللهَ الْعَظِيْمَ لَيْ وَلَكُمْ وَلِسَائِرِ الْمُسْلِمِيْنَ وَالْمُسْلِمَاتِ وَالْمُؤْمِنِيْنَ وَالْمُؤْمِنَاتِ فَاسْتَغْفِرُوْهُ إنَّهُ هُوَ الْغَفُوْرُ الرَّحِيْمُ

 

Khutbah II 

 

 اَلْحَمْدُ لِلّٰهِ حَمْدًا كَثِيْرًا كَمَا أَمَرَ، أَشْهَدُ أَنْ لَا اِلَهَ اِلَّا اللهُ وَحْدَهُ لَا شَرِيْكَ لَهُ إِرْغَامًا لِمَنْ جَحَدَ بِهِ وَكَفَرَ، وَأَشْهَدُ أَنَّ مُحَمَّدًا عَبْدُهُ وَرَسُوْلُهُ سَيِّدُ الْخَلَائِقِ وَالْبَشَرِ. اَللّهُمَّ صَلِّ وَسَلِّمْ عَلَى سَيِّدِنَا مُحَمَّدٍ وَعَلَى آلِهِ وَصَحْبِهِ وَمَنْ تَبِعَهُمْ بِإِحْسَانٍ إِلَى يَوْمِ الْمَحْشَرِ. أَمَّا بَعْدُ. فَيَا أَيُّهَا النَّاسُ أُوْصِيْكُمْ وَنَفْسِيْ بِتَقْوَى اللهِ فَقَدْ فَازَ الْمُتَّقُوْنَ. فَقَالَ اللهُ تَعَالَى: إِنَّ اللهَ وَمَلَائِكَتَهُ يُصَلُّوْنَ عَلَى النَّبِيِّ، يٰأَيُّها الَّذِيْنَ آمَنُوْا صَلُّوْا عَلَيْهِ وَسَلِّمُوْا تَسْلِيْمًا. اَللَهُمَّ صَلِّ عَلَى سَيِّدَنَا مُحَمَّدٍ وَعَلَى آلِ سَيِّدَنَا مُحَمَّدٍ،

 

اَللّهُمَّ اغْفِرْ لِلْمُؤْمِنِيْنَ وَاْلمُؤْمِنَاتِ وَاْلمُسْلِمِيْنَ وَاْلمُسْلِمَاتِ، اَلْأَحْياءِ مِنْهُمْ وَاْلاَمْوَاتِ. اَللَّهُمَّ اغْفِرْ لَنَا وَلِوَالِدَيْنَا وَارْحَمْهُمَا كَمَا رَبَّيَانَا صِغَارًا، اَللَّهُمَّ ادْفَعْ عَنَّا اْلبَلاَءَ وَاْلوَبَاءَ وَالزَّلاَزِلَ وَاْلمِحَنَ وَسُوْءَ اْلفِتَنِ مَا ظَهَرَ مِنْهَا وَمَا بَطَنَ عَنْ بَلَدِنَا إِنْدُونِيْسِيَّا خآصَّةً وَسَائِرِ بُلْدَانِ اْلمُسْلِمِيْنَ عامَّةً يَا رَبَّ اْلعَالَمِيْنَ. اَللّهُمَّ أَرِنَا الْحَقَّ حَقًّا وَارْزُقْنَا اتِّبَاعَهُ وَأَرِنَا الْبَاطِلَ بَاطِلًا وَارْزُقْنَا اجْتِنَابَهُ. رَبَّنَا آتِناَ فِى الدُّنْيَا حَسَنَةً وَفِى اْلآخِرَةِ حَسَنَةً وَقِنَا عَذَابَ النَّارِ. وَاَلْحَمْدُ لِلّٰهِ رَبِّ الْعٰلَمِيْنَ   

 

عِبَادَ اللهِ، اِنَّ اللّٰهَ يَأْمُرُ بِالْعَدْلِ وَالْاِحْسَانِ وَاِيْتَاۤئِ ذِى الْقُرْبٰى وَيَنْهٰى عَنِ الْفَحْشَاۤءِ وَالْمُنْكَرِ وَالْبَغْيِ يَعِظُكُمْ لَعَلَّكُمْ تَذَكَّرُوْنَ، وَاشْكُرُوْا عَلَى نِعَمِهِ يَزِدْكُمْ وَاسْأَلُوْهُ مِنْ فَضْلِهِ يُعْطِكُمْ ، وَلَذِكْرُاللهِ أَكْبَرُ

 

Ustadz M Tatam Wijaya, Penyuluh dan Petugas KUA Sukanagara-Cianjur, Jawa Barat.